हामी सबैकाे संसारन्यूज

१७ भदौ, काठमाडौँ । स्पेनिस ला लिगा अन्तर्गतको खेलमा रियल म्याड्रिले लगातार तेस्रो जित दर्ता गरेको छ । रियलले ला लिगामा लगातार तेस्रो जित निकाल्ने क्रममा लेगानेसलाई १ का विरुद्ध ४ गोल अन्तरले हराएको हो ।

रियलको जितमा करिम बेन्जेमाले दुई तथा ग्यारेथ बेल र सर्जियो रामोसले समान एक गोल गरे । लेगानेसका गुइडो कारिल्लोले एक गोल गरे ।

घरेलु मैदान सान्टियागो बर्नबेउमा रियलले १७औं मिनेटमा ग्यारेथ बेलको गोलबाट अग्रता लिन सफल भएको थियो ।
तर, रियलको त्यो अग्रता लामो समय टिकेन । २४औं मिनेटमा लेगानेसले पेनाल्टीबाट बराबरी गोल फर्कायो ।

पहिलो हाफ १–१ गोलको बराबरीमा सकिएको थियो । तर, दोस्रो हाफमा खेलमा पूनरागमन गरेको रियलले थप ३ गोल गर्न सफल भयो । ४८औं मिनेटमा बेन्जेमाले गोल गर्दै रियललाई २–१ को अग्रता दिलाए ।
६१औं मिनेटमा बेन्जेमाले टिमको लागि तेस्रो तथा व्यक्तिगत दोस्रो गोल गरेपछि रियल खेलमा ३–१ ले अघि बढेको थियो । ६६औं मिनेटमा कप्तान सर्जियो रोमोसले पेनाल्टीमार्फत गोल गरेपछि रियलले ४–१ को आरामदायी अग्रता बनायो । जितसँगै रियल ९ अंक सहित लिगको शीर्ष स्थानमा रहेको छ । दोस्रो स्थानको सेल्टा भिगोको ७ अंक रहेको छ भने एक खेल कम खेलेको वार्सिलोनाको ६ अंक रहेको छ ।