हामी सबैकाे संसारन्यूज

१७ असोज, काठमाडौँ । टी–ट्वान्टी विश्व कपअन्तर्गत एसिया छनोटको समूह ‘बी’ को खेलमा आज नेपालले म्यानमारसँग प्रतिस्पर्धा गर्दैछ ।
मलेसियाको क्वालालम्पुरस्थित किनरारा ओभलमा नेपाल र म्यानमारबीचको खेल नेपाली समय अनुसार १२ बजेर १५ मा सुरु हुनेछ ।
तुलनात्मक रुपमा कमजोर प्रतिद्वन्द्धी म्यानमारलाई पराजित गर्दै नेपाल सुखद सुरुवात गर्ने दाउमा रहेको छ । नेपाल र म्यानमारले पहिलो पटक सन् २००६ मा एसीसी ट्रफीमा खेलेको थियो । जुन खेलमा नेपालले म्यानमारलाई १० विकेटले पराजित गरेको थियो । त्यतिबेला नेपालले चमत्कारिक प्रदर्शन गर्दै म्यानमारलाई १० रनमा नै अलआउट गर्न सफल भएको थियो । ११ रनको विजयी लक्ष्यसहित मैदानमा उत्रिएको नेपालले मात्र २ बलमा खेल जितेको थियो । उक्त खेलमा मेहबुब आलमले चामत्कारिक प्रदर्शन गर्दै नेपाललाई उत्कृष्ट जित दिलाएका थिए । उक्त खेलमा नेपालले ईतिहास रचेको थियो । म्यान्मार नेपाल भन्दा तुलनात्मक रुपमा कमजोर भएको कारण पनि नेपालको सुरुआत सुखद हुने अपेक्षा गरिएको छ । यद्धपि म्यान्मारले पनि नेपाललाई रोकेर अघि बढ्न सक्ने कुरालाई नकार्न भने सकिदैन् ।

छनोट प्रतियोगितामा नेपालसँगै आयोजक राष्ट्र मलेसिया, भुटान, सिंगापुर, चीन, म्यानमार र थाइल्याण्ड रहेका छन् । छनोटबाट शीर्ष तीन टोलीले एसिया छनोटमा स्थान बनाउने छन् । एसिया छनोटबाट शीर्ष दुई टोलीले विश्वकपमा स्थान बनाउने छन् । एसिया छनोटमा ७ टोलीले खेल्नेछन् ।