हामी सबैकाे संसारन्यूज

११ कात्तिक, लमजुङ । पारिपट्टि छांगाछुर भीरमा गाउँले मह काढ्दै थिए । वारी पट्टि हेर्नेको भीड । एक्कासी भीरमौरी आएर चिल्न थाल्छ, हेर्नेहरुको भागाभाग हुन्छ ।
स्याँगे झरना नजिकै छोवली भीरमा शुक्रबार मह काढ्न जम्मा भएका मिप्रा गाउँका ६० घरका स्थानीयलाई मौरीले लखट्यो । २५ वर्षदेखि मह काढ्दै आएका ५५ वर्षीय डिल बहादुर गुरुङलाई हिजो आज अचम्म लाग्छ । ‘हाम्रो बानी बिग्रेकाले रिसाएका होलान्,’ उनले भने, ‘आजकल जथाभावि मह काढ्न थालिएको छ । आधुनिक औजार प्रयोग गरिएको छ । भीरमै गएर घनछिनोले कोपेर जाने बाटो बनाइएको छ ।’
सिकारी सादा पोसाकमै गएर मह काढ्थे हिजो आज बाक्लो लुगा, पन्जा र अनुहार ढाकिने जादी लगाउदा पनि टोक्ने गरेको छ । ‘अचेल किन हो कुन्नी मह काढ्न थालेपछि मौरीले लखेटेर हैरान पार्छ,’ मस्र्याङ्दी गाउँपालिदका ४ ताघ्रिङ मिप्राकी चन्द्रकुमारी गुरुङले भनिन्, ‘पहिले पहिले यस्तो गर्थेन् ।’ आजको कान्तिपुर दैनिकबाट