हामी सबैकाे संसारन्यूज

७ कात्तिक, बुटवल । नेकपा (एमाले)का उपाध्यक्ष तथा पूर्व उपप्रधानमन्त्री वामदेव गौतमले नेपालको संविधान विश्वमा उत्कृष्ट संविधान रहेको भन्दै संविधान संशोधन कसैको दबाब र लहडमा नहुने स्पष्ट पार्नुभएको छ । उहाँले कसैले भन्दैमा संविधान संशोधन हुन नसक्नेसमेत बताउनुभएको छ ।

नेकपा (एमाले) रूपन्देहीको आठौँ अधिवेशनको शनिबार भैरहवामा उद्घाटन गर्दै नेता गौतमले एमालेले जनताको भावना र मर्म बुझेर प्रतिपक्षमा बसेर पनि नेतृत्वदायी भूमिका खेलिरहेको बताउनुभयो ।

नेता गौतमले केपी ओली नेतृत्वको पूर्ववर्ती सरकारले ल्याएको नीति तथा कार्यक्रम र विकासमुखी बजेटका कारण माओवादी र नेपाली काँग्रेस आत्तिएर ओली नेतृत्वको सरकार गिराएको आरोप लगाउनुभयो ।

उपाध्यक्ष गौतमले जनताको मन जित्ने र जनताको भाग्य सुनिश्चित हुने काम गर्ने पार्टी एमाले नै भएको दाबी गर्नुभयो ।

कार्यक्रममा एमालेका उपमहासचिव विष्णुप्रसाद पौडेलले अहिले देशको प्रत्येक कुनाकुना र क्षेत्रका नागरिकमा एमालेप्रति आशा, भरोसा र विश्वास जाग्दै गएको भए पनि त्यसलाई परास्त पार्न पश्चगामी शक्तिहरू लागिपरेको आरोप लगाउनुभयो ।

अर्का उपमहासचिव घनश्याम भुसालले नेपालको कम्युनिस्ट आम्दोलनको नेतृत्व एमालेले गरेकाले अबको कम्युनिस्ट आन्दोलनको कार्यभार पूरा गर्न एमाले नै सक्षम रहेको बताउनुभयो ।

पार्टी सचिव प्रदीप ज्ञवालीले संविधान कार्यान्वयनमा सरकार चक्रब्यूहमा फसेको बताउँदै संविधान संशोधनको निहुँमा सरकारले देशमा अस्थिरता निम्त्याउन लागेकाले त्यसको प्रतिरक्षा एमालेले गर्ने बताउनुभयो ।

अधिवेशनको उद्घाटनसत्रमा पोलिटब्युरो सदस्य छविलाल विश्वकर्मा, लुम्बिनी अञ्चल इन्चार्ज वैजनाथ चौधरी, पोलिटब्युरो सदस्य राधा ज्ञवाली, केन्द्रीय सदस्य तथा रूपन्देही इन्चार्ज लीला गिरीलगायतले बोल्नुभएको थियो ।

पार्टीका जिल्ला अध्यक्ष भोजप्रसाद श्रेष्ठको अध्यक्षतामा भएको कार्यक्रममा ज्येष्ठ कम्युनिस्टहरू, भूकम्पीय स्वयम्सेवकहरू, मदन आश्रित स्मृति भवन निर्माण समितिलाई सम्मान गरिएको थियो ।

यसैबीच नेकपा (एमाले) रूपन्देहीको नयाँ निर्माणाधीन भवनको पार्टीका उपाध्यक्ष तथा पूर्व उपप्रधानमन्त्री गौतमद्धारा गरिएको थियो ।