हामी सबैकाे संसारन्यूज

संसारकै प्रेरणादायी र प्रभावशाली सय महिलामध्ये नेपालकी उमावादी १० औं नम्बरमा परेकी छन् ।
बेलायतमा मुख्यालय रहेर प्रशारित हुने बीबीसीले विश्वकै चर्चित महिलाको रुपमा विभिन्न देशका १ सय महिलाको सूचीमा नेपालकी उमावादीलाई १० औं नम्बरमा राखेको हो ।
पिछडिएका वादी समुदायको अधिकारका लागि निरन्तर संघर्ष गर्दै आएकी उनले वादी समुदायको अधिकारका लागि नेतृत्वदायी भूमिका निर्वाह गर्दै आएकोले आफूले यस्तो सम्मान पाएको हुन सक्ने भन्दै खुसी व्यक्त गरेकी छन् ।
उमा वादीले २०६३ सालमा आफ्नै नेतृत्वमा कैलालीमा आन्दोलनको सुरुवात गरेकी थिइन् । त्यस समयमा उनले वादी समुदायका महिलाले गर्नु परेको बाध्यात्मक यौन पेशन, समुदायका बालबालिका दयनिय अवस्था, घरबार नभएकाको समस्या, आमाको नामबाट नागरिकता नपाउने समस्या लगायतका विभिन्न माग राख्दै आन्दोलनको सुरुवात गरेकी थिइन् ।

त्यस्तै २०६४ मा काठमाडौंमा भएको राष्ट्रिय वादी सम्मेलनले आमाको नाममा नागरिकता पाउनुपर्ने, वादी समुदायका बालबालिकाका लागि निःशुल्क शिक्षा तथा भरणपोषण, घरवास कार्यक्रम सहजरुपमा विवाह दर्ता लगायतका मागहरु राखेको थियो । उक्त माग अनुसार नेपाल सरकारले हाल आमाको नामबार नागरिकता दिने व्यवस्था गरेको, घरवास कार्यक्रमको व्यवस्था गरिएको पनि उमावादी बताउँछीन् । उमा वादी नेपाली कांग्रेसका तर्फबाट प्रदेशसभा समानुपातिक सांसद छन् ।