Sansar News
२८ पुस, मस्को । जापानका विदेशमन्त्री तारो कोनो अर्को हप्ता रुसको भ्रमणमा आउने भएका छन् ।
रुसी समकक्षी सेर्गेइ लाभरोभसँग उनले विवादित चार भूभागका बारेमा छलफल गर्ने रुसको विदेश मन्त्रालयले शुक्रबार जनाएको छ ।
रूस र जापानका बीचमा दोस्रो विश्वयुद्धपछि अहिलेसम्म पनि कुनै शान्ति सम्झौता हुन सकेको छैन ।
सिमानामा पर्ने कुरिल्सलाई रूसले आफ्नो क्षेत्रमा पर्ने भूभागको रूपमा दाबी गर्दै आएको छ भने जापानले पनि आफ्नो उत्तरी राज्यको रूपमा दाबी गर्दै आएको छ ।
रूसको विदेश मन्त्रालयका प्रवक्ता मारिज जाखारोभले भने “पहिलो चरणमा रुस र जापानका बीचमा रहेका समस्या समाधान गर्न शान्ति सम्झौता गर्ने बारेमा छलफल हुनेछ ।”
उनीहरुका बीचमा आउँदो सोमबार छलफल हुनसक्ने पनि प्रवक्ता जाखारोभले बताए । उनले दुई देशका बीचमा हुन लागेको सम्झौताका बारेमा जापानी सञ्चारमाध्यमहरूले गलत भूमिका खेलेको आरोप पनि लगाए ।
रुसी राष्ट्रपति भ्लादिमिर पुटिन र जापानी प्रधानमन्त्री सेन्जो आवेबीच गत नोभेम्बरमा भेटवार्ता भएको थियो । सो भेटका क्रममा उहाँहरूले दोस्रो विश्वयुद्धको विवादहरूलाई अन्त्य गर्न औपचारिक रूपमा छलफल गर्ने र सन् १९५६ मा भएको संयुक्त घोषणापत्रमा टेकेर सम्झौताको प्रक्रियालाई अगाडि बढाउने सहमति गरेका थिए ।
वि.सं.२०७५ पुस २८ शनिवार १०:२९ मा प्रकाशित
