हामी सबैकाे संसारन्यूज

१७ फागुन, काठमाडौं । ज्युँदो बाबुलाई मरेको भन्दै किर्ते गरेको एक नेपाली नागरिकता लिएका भारतिय नागरिक पक्राउ परेका छन् ।
भारत विहार अररियाका शम्भु प्रसाद साहले नागरिकता अभिलेखमै नभएका व्यक्तिको किर्ते गरी आवस्यक कागजपत्र बनाई जिल्ला प्रशासन कार्यालय मोरङबाट नागरिकता लिएका थिए ।
२०५६ पुस १३ मा जारी नागरिकतामा साहको बुबा स्वर्गीय अनुपलाल साह लेखिएको छ । तर, उनका बाबु विश्वनाथ साह जीवितै छन् । नगर पञ्चायत जोगवनीले तयार पारेको आम निर्वाचन नामावलीमा साहको बाबुको नाम विश्वनाथ लेखिएको छ ।
मोरङ जिल्ला, विराटनगर ठेगाना उल्लेख गरेका साहले सुरुमा बनाएको नागरिकता हराएपछि बंशजका आधारमा काठमाडौं जिल्ला प्रशासन कार्यालयबाट २०६४ पुस १७ मा प्रतिलिपि लिएको पाइएको छ ।
साहविरुद्ध गृहमन्त्रालयमा उजुरी परेपछि महानगरीय प्रहरी परिसर टेकुले छानविन गरेको थियो । छानविनका क्रममा किर्ते गरेर नागरिकता लिएको खुलेपछि साह गतसाता पक्राउ परेका थिए । शुक्रबारको नागरिक दैनिकमा सुवास गोतामेले लेखेका छन् ।