हामी सबैकाे संसारन्यूज

२६ फागुन, बाजुरा ।   उमेरमा कम भए पनि कलामा परिपक्व देखिएका अशोक दर्जी र एआर बुढाथोकीले दर्शकलाई दमदार प्रस्तुति दिएका छन् । बडिमालिका बृहत सांस्कृतिक कार्यक्रममा देखाएको कला र प्रस्तुतिले दर्शकको मन जित्न अशोक र एआर सफल बनेका छन् । हेर्दा दाजुभाइजस्तै लाग्ने अशोक र एआरले प्रस्तुति दिँदा, गाउँदा नाच्दा उस्तैउस्तै योग्यता र परिपक्वता देखिएको थियो ।

परिचयबाट मञ्च सम्हालेका उनीहरूले आमाभन्दा राम्री कोही छैनन्, संसारमै गीतबाट प्रस्तुति शुरु गरेका थिए । गाउँदा, नाच्दा र संवाद बोल्दा दर्शक मख्ख देखिन्थ्ये । मनविनाको धन ठूलो कि धनविनाको मन र आमाभन्दा राम्री कोही छैन संसारमै बोलको गीत गाउँदा दर्शक शान्त बनेका थिए ।

लाग्थ्यो दर्शक गीतको सङ्गीतमा झुमेका मात्र थिएनन्, शब्दको गहिराइमा डुबेका थिए । सानै उमेरमा देखिएको प्रतिभा र भावयुक्त गीतमा केही दर्शकका आँखा नै रसाएका देखिन्थे । गीत गाउँदा बीचबीचमा टङ्क बुढाथोकीले पनि साथ दिएका थिए । प्रस्तुतिका लागि तीनै एकसाथ मञ्चमा देखिए पनि अशोक र एआरले नै दर्शकको मन जिते ।

अशोक र एआरको प्रस्तुति हेर्न तीन दिनदेखिको प्रतिक्षा पनि दर्शकले मेटाएका छन् । मनोरञ्जन र कला संस्कृतिको प्रवद्र्धन गर्न कार्यक्रम आयोजना गरिएको हो । तीनै जनाले एकसाथ गाइरहँदा सँगै गाउन र नाच्नमा दर्शकले खुलेरै साथ दिएका थिए ।

कार्यक्रम फागुन २३ गतेबाट शुरु भई शनिबार सम्पन्न भएकोे छ । तेस्रो दिन अशोक, टङ्क र एआरसहित अमृता लामिछाने र मोडल दिव्यानी बोहराले पनि प्रस्तुति दिएका थिए । अशोक र एआरसँग फोटोे खिचाउनेको भीड थाम्न स्वयंसेवक र प्रहरीलाई हम्मेहम्मे परेको थियो । कार्यक्रममा चर्चित देउडा गायक प्रकाश थापा, प्रमोद डिजी, हर्क खडायत, रोशनी रोकायासहितका स्थानीय कलाकारले पनि प्रस्तुति दिएका थिए ।

मदिरा नष्ट

बाजुराको धुलाचौरमा रहेको अस्थायी प्रहरी पोष्टले तीन पेटी गुणस्तरहीन मदिरा बरामद गरी नष्ट गरेको छ । खच्चडबाट बोकेर मुगुको खत्याड गाउँपालिका लैजाँदै गरेको अवस्थामा दिवाना नामक गुणस्तरहीन तीन पेटी मदिरा प्रहरीले बरामद गरी नष्ट गरेको जिल्ला प्रहरी कार्यालय बाजुराले जनाएको छ ।

मुगुका दलचन्द्र थापाले चामलको बोराभित्र लुकाएर मदिरा मुगु लैजाँदै गरेका थिए । कोल्टीबाट मुगु जाँदै गर्दा प्रहरीको गस्ती टोलीले सुराकीका आधारमा बरामद गरेको प्रहरी नायव उपरीक्षक उद्धवसिंह भाटले जानकारी दिए । दशैँपछि बाजुरामा अहिलेसम्म चार हजार अवैध घरेलु मदिरा र गुणस्तहीन रक्सी बरामद गरी नष्ट गरिएको प्रमुख भाटले बताए ।