Sansar News
३ चैत, काठमाडौं । नेकपाले जिल्ला तहका सचिवको नामावलीसहितको प्रस्ताव तयार पारेको छ । जिल्ला तहमा तत्कालीन एमालेबाट ५७ र तत्कालीन माओवादीबाट ४३ प्रतिशत हुनेछन् ।
प्रस्ताव अध्यक्ष केपी ओली र अर्का अध्यक्ष पुष्पकमल दाहालले महासचिव विष्णु पौडेलेको सहयोगमा तयार पारेका हुन् । ७७ वटै जिल्लामा अध्यक्ष र सचिवको नामावलीसहितको प्रस्तावमाथि आईतबार बस्ने पार्टी सचिवालय बैठकमा छलफल हुँदैछ ।
एकताका क्रममा तत्कालीन एमालेले अध्यक्ष पाएको जिल्लामा तत्कालीन माओवादीले सचिव र तत्कालीन एमालेले सचिव पाएको जिल्लामा तत्कालीन माओवादीले अध्यक्ष लिने समझदारी थियो । सोहि आधारमा अध्यक्षद्धयले जिल्ला अध्यक्ष र सचिवको नामावली तयार पारेका हुन् ।
केन्द्रीय कार्यालय सचिव कृष्ण गोपाल श्रेष्ठले आइतबार बस्ने सचिवालय बैठकले तल्लो तहसम्मको एकता प्रक्रिया टुंगो लगाउने अन्तिम प्रस्ताव तयार पार्ने जानकारी दिए । आइतबारको अन्नपूर्णपोष्ट दैनिकमा रामकृष्ण अधिकारीले लेखेका छन् ।
वि.सं.२०७५ चैत ३ आइतवार ०७:४० मा प्रकाशित
