हामी सबैकाे संसारन्यूज

२१ कात्तिक, बेनी, म्याग्दी । रोजगारी र व्यवसायका लागि प्रवासमा रहेका म्याग्देलीले जिल्लाका सबै बस्तीमा इन्टरनेट सुविधा विस्तार गर्न ५० लाख रुपैयाँ जुटाएका छन् ।

म्याग्दी प्रवासी नेपाली सङ्घ (मोना) अन्तर्राष्ट्रिय कार्यसमितिले जिविसले अघि बढाएको जिल्लालाई फ्रिवाइफाई बनाउने योजनामा वित्तीय व्यवस्थापनका लागि सहयोग जुटाएका हुन् । देशमै नमुनाका रुपमा म्याग्दीमा सञ्चालन हुन लागेको इन्टरनेट सेवा विस्तार योजनाका लागि हालसम्म रु ५० लाख जुटाइसकिएको मोनाका कोषाध्यक्ष चक्र थापाले जानकारी दिनुभयो ।

मोनाका पदाधिकारीका साथै केही देशबाट सहयोग प्राप्त भएको छ । सबै देशमा रहेका मोनाको कार्यसमितिमार्फत सहयोग सङ्कलन कार्यलाई निरन्तरता दिइएको छ । मोनाको विश्वका २२ देशमा राष्ट्रिय समिति गठन भएको छ । रु चार करोड लागत अनुमान गरिएको योजनाका लागि नेपाल ग्रामीण दूरसञ्चार प्राधिकरण कोषले ५० प्रतिशत लगानी गर्न सहमति जनाएको छ । वित्तीय स्रोत व्यवस्थापन भएको छ महिनाभित्र सबै बस्तीमा इन्टरनेट पु¥याउने गरी तयारी भएको छ । मोनाको पहलमा प्रवासी म्याग्देलीबाट स्थानीयस्तरमा सङ्कलन गर्नुपर्ने वित्तीय स्रोत व्यवस्थापनका लागि सहकार्य गरिएको जिविसले जनाएको छ ।

दुर्गमको विद्यालय चन्दाकै भरमा सञ्चालन

यसैगरी मुदी–३ का टेकप्रसाद रोका गाउँमा नयाँ मान्छे देख्ने बित्तिकै विद्यालयका लागि आर्थिक सहयोग माग्नुहुन्छ । उहाँसँगैै भानसिंह रोका, दलमाया रोकासहित मुदी नाउरावासीको दैनिकी उस्तै छ ।

गाउँमा रहेको विद्यालयलाई सरकारी सेवासुविधा उपलब्ध नभएपछि बाध्य भएर अभिभावकले विदेशबाट फर्किएका लाहुरे, धौलागिरि बेस क्याम्प घुम्न जाने विदेशी पर्यटकलाई आफ्ना बालबालिकाले अध्ययन गर्ने विद्यालयलाई चन्दा सङ्कलन गर्ने गरेका छन् । २०६७ सालमा रनजनज्योति बालविकास केन्द्रको स्थापना गरेका नाउरावासीले तीन वर्षसम्म जिल्ला शिक्षा कार्यालयबाट मासिक दुई हजार उपलब्ध गराए पनि त्यसयता कुनै पनि सरकारी सहयोग पाएका छैनन् । विद्यालयको भौतिक पूर्वाधार, शिक्षकको तलबसहित आवश्यक सामग्री जुटाउन आर्थिक सङ्कलन अभियान सञ्चालन गर्ने गरेका छन् ।

देशभर आधारभूत तहको शिक्षा निःशुल्क उपलब्ध गराइरहेको अवस्थामा नाउराका स्थानीयवासीले शिक्षकको तलब, आफ्ना बालबालिकाको पाठ्यपुस्तकसमेत आफँै खरिद गर्ने गरेका छन् । “अभिभावकको सक्रियतामा विद्यालय सञ्चालन भइरहेको छ । आफ्ना बालबालिकालाई कुनै पनि समस्या नहोस् भनेर निरन्तर चन्दा सङ्कलन गर्नुहुन्छ”, विद्यालयकी प्रधानध्यापक दीपा गर्बुजाले भन्नुभयो । २१ घरधुरी रहेको नाउरा गाँउका ११ जना विद्यार्थीलाई भौतिक पूर्वाधारको अभावमा एउटै कक्षामा राखेर पठनपाठनको व्यवस्था गरिएको छ । रासस