हामी सबैकाे संसारन्यूज

८ चैत्र । भारतीय जनता पार्टी(भाजपा) का पूर्व अध्यक्ष तथा वरिष्ठ नेता लालकृष्ण आडवानीको नाम उम्मेदवारको पहिलो सूचिमा नपरेपछि उनका समर्थकहरुले मोदीलाई पूर्वाग्रहीको आरोप लगाएका छन् ।

उनले चुनाव लड्दै आएको गुजरातको गान्धिनगरबाट भाजपा अध्यष अमित शाहलाई उम्मेदवार सार्वजनिक गरिनु र १८४ जनाको पहिलो सूचिमा उनी नपरेपछि उनका समर्थकहरु रुष्ट भएका हुन् ।

यता नेपालसँग सिमा जोडिएको उत्तर प्रदेशकी चर्चित नेतृ मायावती निर्वाचनमा प्रतिस्पर्धामा नजाने बताएकी छन् । उत्तर प्रदेशको सत्तारुढ भाजपालाई जसरी पनि परास्त गर्नकै लागि आफू नउठ्ने घोषणा गरेकी मायावती ४ पटक मुख्यमन्त्री भैसकेकी व्यक्तित्व हुन् ।

आगामी अप्रिल ११ देखि विभिन्न चरणमा हुने निर्वाचनको पूर्व सन्ध्यामा बहुजन समाज पार्टीकी नेतृ मायावतीले यस्तो घोषणा गरेपछि उत्तर प्रदेशमा तरङ्ग फैलिएको छ । आफूले जित्नुभन्दा पनि पार्टीलाई जिताउन त्यसो गर्नु परेको भन्दै समर्थकलाई आश्वस्त पारिरहेकी मायावतीले चुनाव परिणाम अब आफ्नो पक्षमा आउने बताएकी छन् ।

यसैबीच प्राप्त समाचार अनुसार बिजेपीको सूचिमा प्रधानमन्त्री नरेन्द्र दामोदरदास मोदीलाई फेरि पुरानै निर्वाचन क्षेत्र बनारस दिइएको छ । आफ्ना विपक्षी राष्ट्रिय कांग्रेसका मधुसुदन मिस्त्रिलाई ५ लाख बढी मतले जितेका मोदीलाई यो पटक भने पहिले जस्तो सहज नभएको बताइएको छ ।