हामी सबैकाे संसारन्यूज

१३ चैत, काठमाडौं । भौतिक पूर्वाधार तथा यातायात मन्त्री रघुवीर महासेठले ठकेदारको लापरवाही र जर्वजस्तीका कारण टेकु र तीनकुनेको पुलमा समस्या देखिएको बताएका छन् ।

मंगलबार संघीय संसद्को विकास तथा प्रविधि समितिमा जवाफ दिदैं मन्त्री महासेठले पप्पु कन्ट्रक्सनले निर्माण गरिरहेको दुवै पुलमा सरकारी प्राविधिकलाई छलेर गुणस्तरहीन निर्माण सामग्री प्रयोग गरेको बताए । सुरुमै गुणस्तरहीन समान प्रयोग गरेको र रोक्न निर्देशन दिँदादिँदै प्राविधिकको उपस्थिति विना नै टेकु–कालीमाटी पुल ठेकेदारले राति ढलान गरेको मन्त्रीको भनाई छ ।

‘कागजपत्र अध्ययन गर्दै प्राविधिकले टेकु पुल निर्माण रोक्न निर्देशन दिँदा समेत ठेकेदारले काम अघि बढाएको भेटिएको छ,’ महासेठले भने, ‘राति काम गर्नु अन्यथा नभए पनि प्राविधिकको उपस्थिति विना काम गर्नु गलत हो ।’

दुवै पुल निर्माणमा प्राविधिकको भने कुनै गल्ती नभएको मन्त्रीको दावी छ । अव विग्रेको पुल भत्काएर सरकारले लगानी गर्न नपर्ने गरी पप्पुलाई नै निर्माण गर्न लगाउने उनले बताए । पुलमा देखिएका कमजोरीलाई इन्जिनियरिङ अध्ययन संस्थान पुल्चोकबाट अध्ययन समेत भइसेको छ । बुधबारको नयाँपत्रिका दैनिकमा जीवन बस्नेतले लेखेका छन् ।