Sansar News
१८ चैत, काठमाण्डौं । खानेपानी मन्त्रीको विना मगरको विदेश भ्रमण स्थगीत गरिएपछि सर्वत्र आशंका र जिज्ञासाहरु बढाइएको छ ।
आफ्नो विभागीय मन्त्रीको सूचीमा परेको मात्र होइन, मन्त्रीसँगै विदेश भ्रमणका लागि सबै तारतम्य मिलाएका २ जना सहसचिव र १ जना उपसचिवको समेत भ्रमण रोकिएको छ ।
नेपाल सरकारको विदेश भ्रमण सम्बन्धी निर्देशिका र मितव्ययिता सम्बन्धी विषयलाई ओली सरकारले कडाइ गरेपनि यसअघि मन्त्री सहित मन्त्रालयका कर्मचारी विदेश जाने निर्णयलाई मन्त्रीपरिषद्ले अनुमोदन गर्दै आएको थियो ।
खानेपानी मन्त्रालय स्रोतका अनुसार मन्त्रिपरिषद्को बैठकले मन्त्री विना मगरको कोष्टारिका भ्रमण स्वीकृत नगरेपछि मन्त्रीसँगै जाने सूचीमा रहेका सहसचिव तेजलाल भट्ट, सुनिलकुमार दास र उपसचिव चेतराज उपाध्याय पनि जान नपाउने भएका छन् ।
‘मन्त्रिपरिषद्बाट भ्रमण अनुमोदन नभएको भन्नु भन्दा पनि स्थगित भएको हो ।’ संसारन्यूजको कुराकानीमा खानेपानी मन्त्रालयका प्रवक्ता शंकर प्रसाद सुवेदीले भने ।
मन्त्रालय स्रोतका अनुसार कोस्टारिका भ्रमणका लागि मन्त्रीले सहसचिव सम्मका कर्मचारीको निर्णय गरेकी थिइन् भने त्यसको स्वीकृतिका लागि मन्त्रिपरिषद्मा पठाइएको थियो ।
मेलम्ची परियोजनाको ठेकेदार फर्किएको र काम पूरा हुन नसकेको विषयमा प्रचार गरिएपनि विदेश भ्रमणबारे राज्यको भार कम गर्ने तथा सार्वजनिक खर्च मितव्ययिता सम्बन्धी मन्त्री विना मगरको भ्रमण स्थगित भएको मन्त्रिपरिषद् स्रोतले बताएको छ ।
त्यस्तै लगानी सम्मेलन लगत्तै मन्त्रीमण्डल पुर्नगठन गर्ने कुरा चलिरहेको बेला मन्त्री मगरको विदेश भ्रमण उचित नदेखिएकाले भ्रमण स्थगित गरिएको हुन सक्ने पनि स्रोतले बताएको छ ।
वि.सं.२०७५ चैत १८ सोमवार १०:३५ मा प्रकाशित
