दश गाविस खाद्य सुरक्षाले जोखिमयुक्त

जिल्ला खाद्य सुरक्षा सञ्जालले बालीको अवस्था, घरधुरी सङ्ख्यालगायत विभिन्न सूचकका आधारमा बुढाखानी, बनखुचौर, फोक्सिङ्टार, गोकुले, डाँडागाउँ, फलामेटार, साल्मेचाकल, सालधारा, घर्तीछाप र मिल्चेमा त्यस्तो समस्या देखिएको हो ।

“मकै र धान बाली भित्रिकाले समस्या छैन, तर वर्षभरिमा खाद्य सुरक्षाको जोखिम देखिन्छ,” जिल्ला कृषि विकास कार्यालयका सहायक सूचना अधिकारी विष्णु अधिकारीले भन्नुभयो ।

नेपाल खाद्य सुरक्षा अनुगमन प्रणालीका जिल्ला संयोजक भरत थापा विगत वर्षमा जिल्लाको कोसीपारि गाविसमा देखिएको खाद्य सुरक्षाको जोखिम हटेको र १० गाविसमा ४० प्रतिशत खाद्यान्न अपुग भएको बताउनुहुन्छ ।

मकै बाली भित्र्याएको र धान बाली भित्र्याउन लागेकाले खाद्य सञ्चित रहेको आँैल्याउँदै उहाँले भौगोलिक विकटता र सडक सञ्चालन नभएका कारण ढुवानीमा समस्या रहेको बताउनुभयो । ती गाविसका बासिन्दाले चामल, दाल, आलु, मकैको उपभोग गरिरहेका छन् ।

करिब तीन महिनाका लागि खाद्यान्न सञ्चित रहेको तथा जोखिमयुक्त गाविसमा खानाको परिमाण घटाएर खाने र कम रुचिकर खाना खाने समेत पाइएको सञ्जालले जनाएको छ । रासस