हामी सबैकाे संसारन्यूज

२५ कात्तिक, काठमाडौं । काठमाडौंका विभिन्न बैंकका एटिएमबाट नेपाली तथा विदेशी ग्राहकको खाताबाट रकम निकाल्ने २ टर्किस नागरिक पक्राउ परेका छन् ।
उनीहरुलाई बैंकको प्राविधिक सहयोगमा प्रहरी प्रधान कार्यालय केन्द्रीय अनुसन्धान व्यूरोले विहिबार कान्तिपथ स्थित एलो प्यागोडा होटलबाट पक्राउ गरेको हो ।
प्रहरीका अनुसार राहदानी नम्बर यु १२८७७१८० को पासपोर्ट बोकेका ५२ बर्षीय मुहरिम उजुन र राहदानी नम्बर यु १२६७४५८८ ३२ बर्षीय सेलाहत्तिन याबर नामका टर्कीस नागरिकहरु पक्राउ परेका हुन् ।
उनीहरुबाट विभिन्न दरका नेपाली रुपैंया २६ लाख ७५ हजार, युरो १ हजार ७ सय, अमेरिकी डलर १ हजार ६ सय ६०, विभिन्न एटीएम कार्डहरु १ सय १३ थान, मोबाइल फोन २ थान, कार्डका पिन लेखिएको कागज ८ पाना र स्वीस घडी १ थान बरामद भएको छ ।
पर्यटन भिसामा नेपाल आएका उनीहरुले कान्तिपथस्थित नबील बैंकको एटीएम बुथबाट रकम निकालेको देखिएको छ ।
हालसम्म विदेशी नागरिक विरुद्ध गरिएको कारवाहीमा ४ रोमानियन, ३ टर्कीस र २ बुल्गेरियन गरी ९ जना पूर्वी युरोपेली नागरिकहरु पक्राउ गरिएको ब्यूरोले जनाएको छ ।