हामी सबैकाे संसारन्यूज

काठमाडौं । भोटेकोशी नदीमा आएको बाढी तथा पहिरोपछि चीनले नेपाललाई आपत्कालीन सहयोग उपलब्ध गराएको जनाएको छ। चिनियाँ विदेश मन्त्रालयका प्रवक्ता गुओ जियाकुनले सामाजिक सञ्जालमार्फत चीनले नेपाललाई उपलब्ध गराएको सहयोगबारे जानकारी दिएका हुन्।

चीनका अनुसार नेपाललाई हालसम्म ५० टन राहत सामग्री, चिनियाँ सरकारबाट २० लाख अमेरिकी डलर नगद सहायता, चाइना रेडक्रस सोसाइटीबाट २ लाख अमेरिकी डलर सहायता, चिनियाँ सुरुङ उद्धार विशेषज्ञका दुई टोली सहित विपद् प्रभावित क्षेत्रका तस्बिर तथा भू-उपग्रह र जलविज्ञानसम्बन्धी तथ्यांक उपलब्ध गराइएको बताएको छ ।

चीनले बाढीपहिरोमा बेपत्ता भएकाहरूको खोजीका लागि आफ्नोतर्फबाट सक्दो प्रयास भइरहेको जनाएको छ।

चिनियाँ विदेश मन्त्रालयका प्रवक्ता गुओका अनुसार बेपत्ता व्यक्तिको संख्या र पहिचान यकिन गर्न चीनमा रहेका विदेशी दूतावासहरूसँग पनि नजिकबाट समन्वय भइरहेको छ। बेपत्ता व्यक्तिको पहिचान तथा त्यसपछि गर्नुपर्ने आवश्यक प्रक्रियालाई उचित ढंगले अघि बढाइने चीनले जनाएको छ।