हामी सबैकाे संसारन्यूज

१८ जेठ, काठमाडौँ । राजधानीमा जारी प्रधानमन्त्री कप एकदिवसीय राष्ट्रिय पुरुष क्रिकेट प्रतियोगितामा प्रदेश नं १ ले कर्णाली प्रदेशलाई पराजित गरेको छ । हारसँगै कर्णाली प्रतियोगिताबाट बाहिरिएको छ । कर्णाली अहिलेसम्म खेलका चारवटै खेलबाट पराजित भएको छ ।

कीर्तिपुरस्थित त्रिवि क्रिकेट मैदानमा शुक्रबार भएको खेलमा प्रदेश १ ले कर्णाली प्रदेशलाई १८० रनले हराएको हो । टस हारेर ब्याटिङ गरेको प्रदेश १ ले ५० ओभरमा ८ विकट गुमएर २२८ रन बनायो । दुई सय २९ रनको विजय लक्ष्य पछ्याउने क्रममा कर्णालीले २० दशमलव १ ओभर खेल्दै ४७ रन मात्र बनायो ।

कर्णालीका लागि निश्चल रावलले १७ रन बनाउनुबाहेक अन्यले दोहोरो अङ्कसमेत जोड्न सकेनन् । बलिङतर्फ प्रदेश १ का कप्तान पुष्प थापा एक्लैले ६ विकेट लिए । म्यान अफ द म्याच भएका थापाले नौ दशमलव एक ओभर बलिङ गर्दै एक मेडन राखि १९ रन मात्र खर्चे । मुकुन्द यादवले तीन तथा कमल खत्रीले एक विकेट लिए ।

यसअघि प्रदेश १ का लागि सिद्धान्त लोहनीले सात चौकासहित सर्वाधिक ६३ रनको योगदान दिए । फिर्दोस अन्सारीले अविजित ४५, सन्नी पुनले ३४, पुष्प थापाले २९, राजन मगरले १६ तथा मिनास थापाले १३ रन बनाए । बलिङतर्फ कर्णाली प्रदेशका प्रकास जैसी, ललित प्याकुरेल र दिवान पुनले दुई/दुई विकेट लिए । चार खेलमा पराजित कर्णाली प्रतियोगिताबाट बाहिरिएको छ ।