हामी सबैकाे संसारन्यूज

३ साउन, काठमाडौँ । काठमाडौँ सिनामंगलको ४३ रोपनी ५ आना ३ पैसा सरकारी जग्गा व्यक्तिका नाममा रहेको पाइएको छ । काठमाडौँ मेडिकल कलेज अघिल्तिर पर्ने साबिक कित्ता नं. ३६५ को उक्त जग्गाको विवरण मालपोत कार्यालय डिल्लीबजारको ढड्डाबाट भने गाएब भएको छ ।

सिनामंलको फाँटमा वाग्मती खोला पसेपछि गुठी संस्थानले २०४४ माघ ५ गते त्यसको ४३ रोपनी ५ आना ३ पैसा जग्गा सरकारका नाममा दर्ता गर्ने निर्णय गरेको थियो । त्यसलाई विभिन्न मुद्दा मामिला गरेर नारायणप्रसाद लामिछानेले कब्जामा लिएका थिए । सर्वाेच्च अदालतले ९ वर्षअघि अन्तिम फैसला गर्दै जग्गा सरकारकै नाममा दर्ता गर्न आदेश दिएको थियो । सर्वाेच्चको आदेश कार्यान्वयन नगरिँदा त्यस ठाउँमा अहिले व्यक्तिगत घरैघर छन् ।
मालपोत कार्यालय डिल्लीबजारमा उपलब्ध कित्ता नं. ३६५ को उक्त जग्गाको डिजिटल स्रेस्तामा संस्थाको नाम ‘श्री ५ को सरकार’ लेखिएको छ भने ठेगाना ‘नखुलेको’ भनिएको छ ।

दर्ता नम्बर पनि नरहेको, जारी गर्ने कार्यालयको नाम पनि उल्लेख नभएको र दर्ता मिति पनि नलेखिएको उक्त विद्युतीय मिसिलको तलतिर भने सरकारी जग्गा राजीनामा भई लिखित पारित गरिएको विवरण छ । शुक्रबारको कान्तिपुर दैनिकबाट