हामी सबैकाे संसारन्यूज

काठमाडौँ, ७ काठमाडौँ । सङ्घीय संरचनामा हुलाकको संरचना कस्तो हुने भन्ने विषयमा अध्ययन गरी खाका तयार गर्न हुलाक सेवा विभागले पाँच सदस्यीय कार्यदल गठन गरेको छ ।

विभागका महानिर्देशक सुरेश अधिकारीको संयोजकत्वमा गठन गरिएको कार्यदलले सात दिनभित्र स्थानीय तहसम्म रहेको हुलाकको सङ्घीय संरचनाको स्वरुपबारे प्रतिवेदन तयार गरी सूचना तथा सञ्चार मन्त्रालयमा बुझाउने विभागका निर्देशक राजन पौडेलले जानकारी दिनुभयो ।

उहाँले देश सङ्घीय संरचनामा गएपछि पुरानै ढङ्गबाट सञ्चालित हुलाक सेवालाई आधुनिक प्रविधिसँग समन्वय गराई कसरी लैजान सकिन्छ भन्ने विषयमा पनि कार्यदलले छलफल गर्नेछ । उहाँले भन्नुभयो, “हुलाको ठूलो संरचना छ । जुन तल्लो निकायसम्म रहेको छ । विभागअन्तर्गत पाँच कार्यलय छन् । सङ्घीय संरचनामा ती कार्यलयलाई आपसमा गाभेर कसरी कार्यसम्पादन गर्ने भन्ने विषय पनि कार्यदलले काम गर्छ ।”

विभागअन्तर्गत अहिले गोस्वारा हुलाक, केन्द्रीय धनादेश कार्यालय, फिलाटेलिक ब्युरो, हुलाक परीक्षण केन्द्र र केन्द्रीय टिकट भण्डारले कार्य गरिरहेका छन् । हाल देशभर इलाका हुलाक र अतिरिक्त हुलाक गरी ८५० कार्यालय सञ्चालित छन् । रासस