Sansar News
१ भाद्र, काठमाण्डौं । चितवनको एक होटलमा झुण्डिएको अवस्थामा मृत भेटिएका पत्रकार शालिकराम पुडासैनीको परिवारले किटानी जाहेरी दिएको छ ।
पुडाशैनीका परिवारले काठमाण्डौं प्रहरी परिसर टेकुमार्फत् टेलिभिजन कार्यक्रम (सिधा कुरा जनतासँग) का प्रस्तोता रवि लामिछाने, पत्रकार युवराज कँडेल र प्रेमिका भनिएकी अस्मिता कार्की विरुद्ध उजुरी दिएको टेकु प्रहरीले जनाएको छ ।
आइतबार दिउसो पुडासैनीका परिवारले दिएको उक्त किटानी जाहेरी चितवन पठाइने टेकु प्रहरीले जनाएको छ ।
२०७५ भदौमा जारी मुलुकी अपराध संहिताले आफूलाई पायक पर्ने जुनसुकै ठाउँबाट पीडित तथा पीडितका परिवारले किटानी जाहेरी दिन सक्ने व्यवस्था अनुसार पुडासैनीको परिवारले काठमाण्डौंबाट किटानी जाहेरी दिइएको बताइएको छ ।
साउन २२ गते नारायणगढस्थित एक होटलमा झुण्डिएको अवस्थामा फेला परेका नुवाकोट कुमरीका पत्रकार शालिक राम पुडासैनीले आत्महत्या गर्नुपूर्व आफू बाध्य भएर मर्नु परेको भन्दै रेर्कड गराएको भिडियो सार्वजनिक भएको थियो । उक्त भिडियोमा पुडासैनीले लामिछाने, कँडेल र कार्कीका कारण आफू मर्न बाध्य भएको बताएका थिए ।
अनुसन्धानमा प्रभाव पर्ने दावी गर्दै चितवन प्रहरी र काठमाण्डौं प्रहरीले गत विहिबार (साउन ३०) गते लामिछानेसहित ३ जनालाई नियन्त्रणमा लिएर चितवन लगेको थियो ।
वि.सं.२०७६ भदौ १ आइतवार १८:४१ मा प्रकाशित
