हामी सबैकाे संसारन्यूज

१२ भदौ, युएई । युएईमा कार्यरत एक नेपालीको उपचारकै क्रममा मृत्यु भएको छ । डेढ महिनादेखि आबुधाबिको माफरक अस्पतालमा उपचार गराइरहेका उदयपुर पुरानदहका ३८ वर्षीय केदार कुमार कठायतको विहिबार ज्यान गएको हो ।

आवुधाविमा रहेको मिडिल ईस्ट कम्पनीमा सेक्युरेटीमा कार्यरत कठायत दुई महिना अघि व्यायाम गर्ने क्रममा एक्कासी बेहोस भएर ढलेका थिए । उनलाई तत्कालै साथीहरुले अस्पताल पुर्याएका थिए । शरीरमा रगत जमेको र एउटा मिर्गौलाले समेत काम गर्ने छोडेको कारण उनको आइसीयुमा राखेर उपचार गरिएको थियो । उपचारमा केही सुधार आएपनि फेरि पहिले जस्तै बेहोस भएपछि डाक्टरले अब बचाउन नसकिने बताएको दुई दिनपछि उनको ज्यान गएको कठायतका आफन्त सन्तोष कोइरालाले जानकारी दिएका छन् ।

यता केदारको ज्यान गएको खबरले उनका ५१ वर्षीय काका नरेन्द्र बहादुर कठायतको पनि हृदयघातका कारण ज्यान गएको बताइएको छ । साथै श्रीमानको युएईमा भएको मृत्युको खबरले उनकी श्रीमती पनि बेहोस् भएको बताइएको छ ।

अहिले कठायतको शब खलिफा अस्पताल आवुधाविमा राखिएको छ भने प्रक्रिया पूरा गरेर उनको शब नेपाल पठाउन आवस्यक पहल भइरहेको नेपाली दूतावास युएईका काउन्सिलर भेष बहादुर कार्कीले बताएका छन् । केदारको परिवारमा बुबा आमासहित श्रीमती र दुई छोरी रहेको बताइएको छ ।