हामी सबैकाे संसारन्यूज

 १० मङ्सिर,भोजपुर । भोजपुरका आगलागी पीडितका लागि सरकारसँग राहत प्याकेज माग गर्ने विषयमा सात सदस्यीय प्याकेज निर्माण उपसमिति गठन गरिएको छ ।

जिल्ला दैवी प्रकोप उद्धार समिति अध्यक्ष तथा प्रमुख जिल्ला अधिकारी अर्जुनकुमार शर्माको अध्यक्षतामा बिहीबार बसेको समितिको बैठकले पूर्वसांसद सुदन किराँतीको संयोजकत्वमा सात सदस्यीय उपसमिति गठन गरिएको हो ।

आगलागी पीडितका लागि सरकारसंग राहत प्याकेज मागगरी पठाउने विषय तयार गरी उपसमितिले तीन दिनभित्रमा प्याकेज तयार गरी सक्नुपर्ने भएको छ । उपसमितिले आगलागी पीडितका लागि सङ्कलन भएको राहत रकम कुन मापदण्डअनुसार वितरण गर्ने भन्ने ढाँचासमेत तयार गर्ने जिम्मेवारी पाएको छ ।

जिल्ला दैवी प्रकोप उद्धार समितिको बैठकले आगलागीबाट ध्वस्त संरचना हटाएर अस्थायी रुपमा भए पनि सोही जग्गामा बस्ने वातावरण बनाउन नेपाली सेनाको रणबम गण र सशस्त्र प्रहरी टक्सार गुल्मलाई सहयोग माग्ने निर्णयसमेत गरेको छ । बैठकमा समितिका अध्यक्ष तथा प्रमुख जिल्ला अधिकारी शर्माले आगलागी पीडितका लागि हालसम्म सात लाख २७ हजार आठसय एक रुपैयाँ सङ्कलन भएको जानकारी दिनुभयो ।

सोही क्रममा भोजपुर नगरपालिका–७ डाँडागाउँका नरहरि राईले रु ५० हजार र सगरमाथा ट्याक्सी व्यवसायी सङ्घबाट सङ्कलित रु २५ हजार पनि जिल्ला दैविप्रकोप उद्धार समितिका अध्यक्ष तथा प्रजिअ शर्मालाई बुझाउनुभएको थियो । रासस