हामी सबैकाे संसारन्यूज

१९ भदौ, काठमाण्डौं । समाजवादी पार्टीकी नेतृ हिसीला यमीले गरेको एउटा ट्विट विहिबार सामाजिक संजालभरी चर्चा बनेको छ ।

पूर्वप्रधानमन्त्री बाबुराम भट्टराईकी पत्नी तथा नेतृ यमीले आफ्ना श्रीमानको नामको थरमा यमी लेखेकै कारण उनलाई सामाजिक संजालहरुमा मजाक पात्र बनाइएको हो । साथै कतिपयले उनको यस्तो ट्विटलाई महिला अधिकारसँग पनि जोडेर विश्लेषण गरेका छन् ।

नेतृ यमीले ट्विटमा आफ्ना श्रीमान बाबुराम भट्टराईको थरमा ‘यमी’ पनि जोडिदिएकी छन् । उनले आफ्ना ससुरा भोज प्रसाद भट्टराईको जन्मोत्सव कार्यक्रमको सम्झनामा गरेको ट्विटमा यस्तो लेखेकी हुन् । उनले लेखेको ट्विट सामाजिक संजालमा मजाक बनाउन थालिएपछि डा. बाबुराम भट्टराईले पनि पत्निको थरमा पतिको थर जोडेजस्तै पतिको थरमा पनि पत्निको थर जोड्न किन नहुने भन्ने प्रश्न गरेका छन् ।

‘केहि रुढीवादीले हिसिला जीको नाम पछाडि अनाधिकृत ढंगले पतिको थर जोड्न थालेपछि पतिले पनि किन पत्नीको थर नजोड्ने ? भन्नु स्वभाविक हो । विवाह गर्दैमा जीन नै परिवर्तन हुन्न, त्यसैले गोत्रसूचक थर फेर्नुपर्दैन् ।’ डा. भट्टराईले लेखेका छन् ।

भट्टराईले विवाह पछि जन्मने सन्तानमा आमाबाबु दुवैको जीन हुने हुनाले उसको थर संयुक्त हुनुपर्ने तर्क समेत राखेका छन् ।