हामी सबैकाे संसारन्यूज

३१ भाद्र, काठमाडौँ । गैरआवासीय नेपाली संघ (एनआरएनए)अन्तर्राष्ट्रिय समन्वय परिषद्(आईसीसी)ले आफ्ना राष्ट्रिय समन्वय समितिहरुलाई प्रतिनिधिको नामावली पठाउनु अनुरोध गरेको छ । एनआरएनए आईसीसीका महासचिव डा बद्री केसीले सेप्टेम्बर १५ मा बसेको परिषद्को ६७ औँ बैठकले गरेको निर्णय अनुसारसबै समितिहरुलाई अन्तर्राष्ट्रिय महाधिवेशनमा मतदान अधिकारसमेतको प्रतिनिधिको नामावली पठाउन आग्रह गर्दै सूचना जारी गरेका हुन् ।

सूचनामा राष्ट्रिय समन्वय समितिहरुले आउँदो अन्तर्राष्ट्रिय महाधिवेशनमा मतदान अधिकारसमेतको प्रतिनिधिको नामावली एनआइएस प्रणालीमा समावेश गर्न मिल्ने गरी यहि सेप्टेम्बर ३० सम्म पठाइसक्नु पर्ने जनाइएको छ । यसरी नामावली पठाउँदा राष्ट्रिय समन्वय समितिले पाउने संख्याको २० प्रतिशत बढी बैकिल्पक प्रतिनिधि पठाउन भनिएको छ ।

समितिहरुले राष्ट्रिय महाधिवेशन संचालन सम्बन्धी नियमावलीमा भएको व्यवस्था अनुसार प्रतिनिधि चयन गरी सूचनामा उल्लेख नमुना अनुसार नामावली पठाउन भनिएको छ । प्रतिनिधि छनौटमा कोही छुटेको खण्डमा छुट्ने प्रतिनिधिले क्षेत्रीय संयोजक मार्फत आईसीसीमा आफ्नो प्राथमिकताको उल्लेख सहित पठाउनु पर्ने र त्यसबारे आईसीसीले गरेको निर्णय नै अन्तिम मानिने बताइएको छ ।