हामी सबैकाे संसारन्यूज

७ असोज, दुवई । दुवई एयरपोर्टमा कार्यरत एकजना भारतीय नागरिकलाई यात्रुको लगेजबाट २ वटा आँप चोरेको अभियोगमा ३ महिनाको जेल सजाय मात्र भएन, ५ हजार दिरहाम जरिवानासहित देश निकाला समेत गरियो ।

उनलाई उक्त जरिवाना र देश निकाला गर्ने फैसला सोमबार दुवईको उच्च अदालतले गरेको दुवईबाट संचालित अनलाईन खलिज टाइम्समा समाचार प्रकाशित छ ।

घटनाको विवरण अनुसार दुबई ईन्टरनेशनल एयरपोर्टमा लगेज ओसार–पसारको काम गर्ने २७ वर्षीया भारतीय नागरिकले २०१७ को अगस्तमा दुवईबाट भारत जान लागेका यात्रुको लगेजबाट २ वटा आँप झिकेको स्वीकारेका थिए ।

उनले आफूलाई पानी प्यास लागेको कारण यात्रुको लगेजबाट दुईवटा आँप निकालेर खाएको बताएका थिए ।  अप्रिल २०१८ मा उनलाई पक्राउ गरेर उक्त घटनाको बारेमा सोधपुछ गरिएको थियो । त्यसपछि उनलाई प्रहरीले पक्राउ गरेको थियो । साथै प्रहरीले उनी बस्ने घरको समेत खोजतलास गरेको थियो । तर, उनले एयरपोर्टबाट त्यस्तो केही समान पनि आफूबस्ने कोठामा लगेका थिएनन् । एयरपोर्टको प्रशासन विभागले उनलाई सिसिटीभीमा यात्रुको लगेज खोलेर आँप निकालिरहेको अवस्थामा भेटेको थियो ।