हामी सबैकाे संसारन्यूज

२० कात्तिक । बागलुङ २ (ख) को मंसिर, १४ उपनिर्वाचनका लागि वाम गठबन्धनबाट ‘बिद्रोह’ गर्दै शेरमान घर्ती मगरले उम्मेदवारी दर्ता गरेका छन् । घर्ती मगरको ढोरपाटन नगरपालिका २ का बौद्धिक वाम युवा नेता दधिराम अर्याल प्रस्तावक र निशीखोला गाउँपालिकाका दलित युवा रिम बहादुर विक समर्थक बसेका छन् ।

साबिक बोबाङ गाविसका अध्यक्ष घर्ती मगर गत स्थानीय निर्वाचनमा तात्कालिन माओवादी केन्द्रबाट ढोरपाटन नगरपालिकाको मेयरका लागि उम्मेदवार थिए । उनले १४ सय बढि मत प्राप्त गरेका थिए । २०७४ मा तात्कालिन एमालेबाट सोही प्रदेशका लागि प्रस्तावित उम्मेदवार दधिराम माओवादी जनयुद्धमै सहभागी थिए । स्थानीय चुनावमा उनी एमाले प्रवेश गरेका थिए ।

जनमोर्चासँग तालमेलपछि दधिरामलाई दबाब दिएर अन्तिम समयमा उम्मेदवारी फिर्ता लिन लगाइएको थियो । सालिन व्यक्ति, अंग्रेजी भाषामा दख्खल भएका दधिरामलाई पार्टी एकतापछि पार्टी सदस्यताबिहिन बनाइएको छ । उनको समर्थनमा लोकप्रिय मानिने शेरमानको उम्मेदवारी दर्ता हुनुले सबैको चासो बढेको छ ।

उम्मेदवारी फिर्ता लिने गरि दर्ता गर्नुभयो ? भन्ने जिज्ञासामा शेरमानले भने ‘दासताको विरुद्ध बिद्रोह हो । तमाम २ नम्बर क्षेत्र (ख)का उत्पीडित जनताको पक्षमा मेरो उम्मेदवारी हो । बिद्रोह रहरले हुँदैन, आवश्यकता हो । मेरो उम्मेदवारी कसैको दबाबमा फिर्ता हुँदैन ।’ शेरमान संघीयता, समावेशी, पहिचान आन्दोलन, पश्चिम बागलुङको पक्षधर आन्दोलन र अभियानमा क्रियाशील छन् ।

उजिर मगर