Sansar News
१० मंसिर, काठमाण्डौं । दक्षिण एसियाली खेलकुद ( साग) मा राष्ट्रिय टोलीका स्पीनर सन्दीप लामिछानेले खेल्न नपाउने भएका छन् ।
घरेलु मैदानमा अर्को हप्ताबाट सुरुहुने खेलकुदमा सन्दीपले भाग लिन नपाउनुको अन्य कुनै पनि कारण नभएर स्वास्थ्यका कारण रहेको बताइएको छ ।
स्पीनर सन्दीपको सोमबार तुरुन्तै आँखाको सल्यक्रिया गरिएको कारण उनले सागमा भाग लिन नपाउने जानकारी राष्ट्रिय टोलीका म्यानेजर रमन शिवाकोटीले दिएका छन् ।
केही महिना अघि आँखाको जाँच गर्ने क्रममा सन्दीपलाई डाक्टरले चश्मा लगाउन भनेका थिए । निरन्तर खेलका कारण त्यो सम्भव नभएको पनि शिवाकोटीले बताएका छन् । सोमबार मात्र अप्रेसन गरेका सन्दीपलाई दुई सातासम्म आराम गर्नुपर्ने सुझाव चिकित्सकले दिएका छन् ।
सन्दीप उक्त टोलीबाट बाहिरीएपछि उनको विकल्पको रुपमा रोहित कुमार पौडेललाई अगाडि ल्याइएको छ ।
भुटान, बंगलादेश, श्रीलंका, मालदिभ्स र नेपाल गरेर पाँच राष्ट्र सम्मिलित उक्त साग अन्तर्गतको खेलमा पुरुष क्रिकेटको खेल किर्तिपूरको त्रिभुवन विश्वविद्यालयको क्रिकेट मैदानमा हुने बताइएको छ ।
वि.सं.२०७६ मंसिर १० मंगलवार १०:२० मा प्रकाशित
