हामी सबैकाे संसारन्यूज

१९ मंसिर , काठमाडौं । नवलपरासी(पूर्व) र डोटीमा भएका छुट्टाछुट्टै सवारी दुर्घटनामा परी २ जनाको मृत्यु भएको छ ।

नवलपरासी(पूर्व),गैंडाकोट नगरपालिका-२ नमस्ते चोकस्थित सडकमा ना.६ प ८०५८ नम्बरको ट्रकले ना.३१ प २६१८ नम्बरको स्कुटरलाई बिहीबार बिहान ठक्कर दिँदा गम्भीर घाइते भएका स्कुटर चालक चितवन भरतपुर महानगरपालिका– १० बस्ने २६ वर्षीय बीरेन्द्र गिरीको नयाँ मेडिकल कलेज भरतपुरमा उपचारको क्रममा मृत्यु भएको हो ।

दुर्घटनामा घाइते भएका स्कुटरमा सवार नवलपरासी गैंडाकोट नगरपालिका–४ का आकाश सिंजालीको सोही अस्पतालमा उपचार भइरहेको छ । दुवै सवारी साधन र ट्रक चालकलाई प्रहरीले नियन्त्रणमा लिएको छ ।

त्यस्तै डोटी,जोरायल गाउँपालिका–२ बुडर जोरायलस्थित सडकमा जिप दुर्घटना हुँदा १ जनाको मृत्यु भएको छ ।

धनगढीबाट जोरायलतर्फ जाँदै गरेको से.१च २०३९ नम्बरको जिप अनियन्त्रित भई सडकबाट अन्दाजी २ सय मिटर तल खसेर बुधबार राति दुर्घटना हुँदा गम्भीर घाइते भएका जिपका चालक जोरायल गाउँपालिका-२ बाजीलेक बस्ने आश्रम थापामगरको सेती प्रादेशिक अस्पताल धनगढीमा उपचारको क्रममा मृत्यु भएको हो ।

दुर्घटनाका सम्बन्धमा स्थानीय प्रहरीले आवश्यक अनुसन्धान गरिरहेको बताइएको छ ।