हामी सबैकाे संसारन्यूज

२२ मंसिर । पर्यटकीय नगरी चितवनको सौराहामा भ्रमण वर्ष सन् २०२० लाई विशेष रुपमा मनाइने भएको छ । अङ्ग्रेजी नयाँ वर्षलाई स्वागत गर्ने गरी आगामी पुस १० गतेदेखि १२ गते सम्म १६औँ हात्ती महोत्सव गरिन लागिएको हो । सो महोत्सव छ दिनसम्म सञ्चालन गरिने महोत्सवको आयोजक संस्था क्षेत्रीय होटल सङ्घ सौराहाका अध्यक्ष दीपक भट्टराईले जानकारी दिए ।

उनका अनुसार महोत्सवमा हात्ती फुटबल, हात्तीपोलो, हात्ती फास्टवाक, हात्ती सुन्दरी प्रतियोगिता, हात्तीको वनभोजसँगै हात्तीका गतिविधिसँग सम्बन्धित विभिन्न खेलहरु हुनेछन् ।

सौराहाको बाघमारा चौरमा हुने महोत्सवमा ५० कक्ष रहनेछन् । ती कक्षमा पर्यटकका लागि लक्षित विभिन्न प्रकारका खानासँगै हस्तकलाका सामग्री बिक्री गरिनेछन् ।

महोत्सवको नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले उद्घाटन गर्ने कार्यक्रम रहेको छ । महोत्सवको समापनसँगै विशेष कार्यक्रमको आयोजना गरी भ्रमण वर्षलाई स्वागत गर्ने तयारी गरिएको उनले जानकारी दिए ।

पर्यटकलाई आकर्षण गर्न विगत केही वर्ष देखि सौराहमा चितवन महोत्सवको आयोजना गरिँदै आइएको छ । नयाँ वर्ष सन् २०२० नेपाल भ्रमण वर्ष भएकाले पनि १६ औँ हात्ति महोत्सव विशेष योजनाका साथ मनाइने अध्यक्ष भट्टराईले बताए ।