हामी सबैकाे संसारन्यूज

२७ मंसिर, काठमाण्डौं । प्रतिनिधि सभाको रिक्त सभामुखमा नेपाल कम्युनिष्ट पार्टी (नेकपा) का स्थायी समिति सदस्य अग्निप्रसाद सापकोटा सिफारिस हुने सम्भावना बढेको छ ।

नेकपाको उच्च श्रोतले दिएको जानकारी अनुसार कार्यकारी अध्यक्ष प्रचण्डका निकट र विश्वासिला पात्र अग्नि सापकोटालाई सभामुख दिइने लगभग निश्चित भएको जनाइएको छ । यद्यपी सभामुखको चर्चामा नेतृ पंफा भुसाल, देव गुरुङ, हरिबोल गजुरेल, पूर्वसभामुख सुवास नेम्वाङ र उपभामुख शिवमाया तुम्बाहाम्फे समेत रहेका छन् ।

कार्यकारी अध्यक्ष प्रचण्डले पाएका कारण सभामुख पूर्वएमालेलाई दिन प्रचण्ड लचिलो बनेको समाचारलाई खारेज गर्दै नेकपाको उच्च श्रोतले भनेको छ– सभामुख पद कसलाई दिने बारेमा टुंग्याउन अध्यक्ष ओलीले प्रचण्डलाई अधिकार दिइसक्नु भएको छ र सो बारेमा प्रचण्डले अग्निजीको नाम पनि भनिसक्नु भएको छ ।’

यसबिच सभामुखको चर्चामा रहेका नेता हरिवोल गजुरेलको पनि अग्निको नाममा समर्थन रहेको श्रोतले बताएको छ । यसबारेमा नेता गजुरेलले संसारन्युजसँगको प्रतिक्रियामा भने–‘यो मैले बोल्ने भन्दा पनि पार्टीले निर्णय गर्ने कुरा हो ।’

राष्ट्रपति विद्या भण्डारी निकटहरुबाट सभामुखको चर्चामा ल्याइएकी र स्वत सभामुखको हकदावी गरिरहेकी उपसभामुख डा. शिवमाया तुम्बाहाम्फे समानुपातिकबाट संसदमा आएकी हुँदा सभामुख बन्न सहज नहुने टिप्पणीहरु पनि आएका छन् भने पूर्वसभामु्ख नेम्वाङले आफ्नो विगतको शालिनतालाई छाडेर महरा प्रकरणमा अनावस्यक बोलेको र बढि हौसिएको कुरा पनि प्रचारमा आएका छन् ।

नेकपाको अर्को श्रोत भन्छ, ‘महिलालाई नै सभामुख दिने स्थिति रह्यो भने नेतृ पम्फा भुसालको सम्भावना पनि उत्तिकै छ । ’