हामी सबैकाे संसारन्यूज

गैरआवासीय नेपाली संघले हालै सम्पन्न भएको १३ औँ दक्षिण एसियाली खेलकुद (साग) मा नेपाललाई पदक दिलाउनेहरु सबैमा बधाई व्यक्त गरेको छ । संघका अध्यक्ष कुमार पन्तद्वारा सार्वजनिक गरिएको बधाई तथा शुभकामना सन्देशमा नेपालले प्राप्त गरेको कीर्तिमानी सफलताप्रति खुशी व्यक्त गरिएको छ ।

संघद्वारा जारी शुभकामना सन्देशमा नेपाललाई ५१ स्वर्ण, ६० रजत र ९५ कास्य (२०६) पदक जितेर नेपाललाई ऐतिहासिक सफलता दिलाउने पदक विजेता, प्रशिक्षक र प्रतियोगितालाई बधाई दिइएको छ ।

विशेषत : पौडी प्रतियोगितामा सहभागी यूके निवासी गैरआवासीय नेपाली खेलाडी गौरिका सिंह (४ स्वर्ण, २ रजत र ३ कास्य) र लन टेनिस (सिंगल) तर्फ अष्ट्रेलिया निवासी संरक्षक बज्राचार्य (१ कास्य) ले प्राप्त गरेको सफलताले आफूहरु अत्यन्त उत्साहित भएको उल्लेख छ ।

‘दोश्रो पुस्ताका गैरआवासीय नेपालीलाई नेपालसँग सीधा जोड्ने माध्यममध्ये खेलकुद पनि एक हो भन्ने हाम्रो सोचलाई उहाँहरुले प्राप्त गरेको सफलताले थप बलियो बनाएको महसुस गरेका छौँ” शुभकामनामा भनिएको छ ।

गैरआवासीय नेपाली खेलाडीलाई नेपालमा आयोजना हुने विभिन्न राष्ट्रिय खेलकुद प्रतियोगितामा सहभागी हुनका लागि सहज वातावरणको निर्माणतर्फ संघ सदैव प्रयत्नरत रहेको र सोही क्रममा राष्ट्रिय खेलकुद परिषद् लगायत नेपाल सरकारका सरोकारवाला निकायसँग पनि संघले निरन्तर छलफल भैरहेको जानकारी गराइएको छ ।

‘यसरी मिलेर जाने कुरामा अझै केही प्रशासनिक र कानूनी झन्झटलाई यथावत रहेकोप्रति संघ नेपाल सरकारसहित राष्ट्रिय खेलकुद परिषद् लगायत सम्वद्ध सबैको ध्यानाकार्षण गराउँदछ’ भनिएको छ ।