हामी सबैकाे संसारन्यूज

५ फागुन, काठमाडौं । व्यवस्थापिका संसदका पूर्वसभामुख कृष्णबहादुर महराले जवरजस्ती करणी उद्योग मुद्दामा काठमाडौं जिल्ला अदालतबाट सफाइ पाएकै दिन उनकै कार्यकालकी पूर्वउपभामुख डा शिवमाया तुम्बाहाङफे कानुन मन्त्रीमा नियुक्त भएकी छिन् । महराकै कारण उपसभामुखबाट हात धुन बाध्य भएकी शिवमायाले संयोगबस महरा रिहाई भएकै दिन बधाई थापिरहेकी छिन् ।

महरा बलात्कार मुद्दामा पुर्पक्षका लागि जेल चलान भएपछि उपसभामुख तुम्बाहाङफेले अर्काले गरेको गल्तीको सजाय आफूले नभोग्ने भन्दै करिब तीन महिनासम्म पद नछाड्ने अडान लिइरहिन् । तर नेकपाका अध्यक्षद्वय केपी शर्मा ओली र पुष्पकमल दाहाल प्रचण्डले उपसभामुख पद त्यागेमा मन्त्री बनाउने आश्‍वासन दिएका थिए। दुई अध्यक्षले उक्त आश्वासन पूरा गरेकै दिन आज महराको पनि रिहाइ भएको हो ।

तुम्बाहाङफे सपथ तयारीमा रहँदा यता महरा पनि गृह प्रवेशको तयारीमा छन् । सभामुख महरालाई संसद् सचिवालयमै कार्यरत एक महिला कर्मचारीले बलात्कार प्रयासको आरोप लगाएपछि उनले असोज १४ गते सभामुख पदबाट राजीनामा दिएका थिए । महराले राजीनामा दिएपछि लामो समय रिक्त रहेको सभामुख पदमा भने नेकपा नेता अग्नी सापकोटा नियुक्त भैसकेका छन् ।