हामी सबैकाे संसारन्यूज

१८ फागुन, काठमाडौं । भैंसेपाटीमा रहेको नेपाली सेनाका पूर्व जर्नेल हेम खत्रीको घर घेर्ने क्रममा बच्चा बोकेकी हेमा श्रेष्ठलाई जथाभावी लाठी हान्ने प्रहरी निरीक्षक (इन्सपेक्टर)को जिम्मेवारी खोसिएको छ । सानो बच्चालाई काखमा च्यापेर भागिरहेकी हेमालाई प्रहरीले पछाडिबाट अन्धाधुन्ध लाठी बर्साइरहेको भिडियो सामाजिक सञ्जालमा भाइरल भएको थियो । त्यस भिडियोमा लाठी हानिरहेको अवस्थामा देखिएका इन्सपेक्टर देवीप्रसाद पौडेलको जिम्मेवारी खोसिएको हो ।

पौडेल महानगरीय प्रहरी प्रभाग, भैंसेपाटीको नेतृत्वमा कार्यरत थिए । उनलाई नेतृत्वबाट हटाएर सट्टामा नयाँ इन्स्पेक्टर पठाइएको जनाइएको छ ।

भिडियो भाइरल भएपछि प्रहरीको चर्को आलोचना भएको थियो । त्यसलगत्तै प्रहरीले छानबिन थालेको बताएको थियो । जिम्मेवारीबाट हटाइएका पौडेलको सट्टामा प्रहरी निरीक्षक सुजित ओझालाई जिम्मेवारी दिइएको हो ।

माला साहले आफू पूर्व जर्नेल हेम खत्रीकी श्रीमती भएको दाबी गर्दै आएकी छिन् । मालाले हाफूलाई खत्रीले बेवास्था गरेको भन्दै महिला आयोगमा उजुरी दिएकी थिइन् । माला साह आफै महिला अधिकारकर्मीको सहयोगमा विहीबार हेम खत्रीको घर घेराउ गर्न पुगेकी थिइन् ।

सोही महिला अधिकारकर्मीको समूहमा आफ्नो बच्चासहित उपस्थित हेमा श्रेष्ठलाई घटनास्थलमा पुगेको महानगरीय प्रहरी प्रभाग बुङमतिको टोलीले पछाडिबाट लाठी चार्ज गरेको थियो ।