हामी सबैकाे संसारन्यूज

२३ फागुन, काठमाडौं । कोरोना भाइरसको संक्रमण एक लाख भन्दा बढीमा देखिएका छ । पहिलो पटक गत डिसेम्बरमा चीनमा देखिएको उक्त भाइरसबाट यो समाचार तयार गर्दासम्म १ लाख १ सय ६२ जनामा संक्रमण देखिएको छ । ३ हजार ४०६ जनाले ज्यान गुमाइसकेका छन् ।

९३ देशमा पुगेको कोरोनाका ५५ हजार ८ सय १२ जना संक्रमित निको भइसकेका छन् । नेपालमा भने अहिलेसम्म कोरोनाका संक्रमित फेला परेका छैनन् । गत जनावरीमै चीनबाट आएका एक नागरिकमा संक्रमण देखिएपनि उनको उपचारपछि संक्रमणमुक्त भएसकेका छन् ।

चीनमा कोरोनाकै कारण तीन हजार ३ सय ८३ मानिसको ज्यान लिएको छ । चीनपछि इटालीमा ठूलो मानविय क्षति भएको छ । इटालीमा कोरोना भाइरसबाट १४८ जनाको ज्यान गैसकेको छ ।

यता इरानमा विदेश मन्त्रीका सल्लाहकारको कोरोना भाइरसका कारण मृत्यु भएको पछिल्लो समाचार प्राप्त भएको छ। बिहीबार साँझ सल्लाहकार होसेन सेखोलेस्लामको कोरोनाको कारण मृत्यु भएको इरानी समाचारपत्र आइआरएनएले जनाएको छ।

अहिलेसम्म इरानमा कोरोना संक्रमितको संख्या ३ हजार ५ सय १३ पुगिसकेको छ भने १ सय ७ जनाको मृत्यु भइसकेको जनाइएको छ। इरानी स्वास्थ्य मन्त्रीसहित अन्य ३३ सांसद पनि कोरोना संक्रमित भएको जनाइएको छ।