हामी सबैकाे संसारन्यूज

२७ फागुन, काठमाडौं । काठमाडौंको पुरानो बसपार्कमा बन्दै गरेको ३२ तले ‘काठमाडौं भ्यूटावर’ ठेक्का लिएर निर्माण कार्य गरिरहेका ठेकदार मनोज भेटवालले प्रहरीसमक्ष आत्मसमर्पण गरेका छन् । महानगरीय प्रहरी परिसर, टेकुमा पुगेर भेटवालले आत्मसमर्पण गरेका हुन् ।

प्रहरीले उनको खोजी तीव्र बनाइरहेकै बेला भेटवालले आत्मसमर्पण गरेको काठमाडौं प्रहरीका डीएसपी होविन्द्र बोगटीले बताए । तेह्रथुम घर भएका भेटवाललाई बैंकिङ कसुर गरेको अभियोगमा प्रहरीले खोजी गरिरहेको थियो । मनोजले दिएको ७५ लाख रुपैयाँको चेक बाउन्स भएपछि उनीबिरुद्ध बैंकिङ कसुरको जाहेरी प्रहरीमा दर्ता भएको थियो ।

सात अर्ब ६४ करोड रुपैयाँको लागतमा टावर बनाइरहेका भेटवालले ७५ लाख रुपैयाँमा किन ठगी गरे भन्ने स्पष्ट हुन सकेको छैन । त्यसो त पछिल्लो समय उनको निर्माण कम्पनी आर्थिक संकटमा फसेको थियो । भेटवाल आर्थिक संकटमा फसेपछि टावर निर्माण पनि अलपत्र परेको छ ।