हामी सबैकाे संसारन्यूज

२९ फागुन । रुपन्देहीको तिलोत्तमा नगरपालिका मुलुकमैं पहिलो पटक शुन्य पोलिथिन नगरपालिका घोषणा हुँदैछ । घोषणा गर्ने काम तयारी अन्तिम चरणमा पुगेको जानकारी दिइएको छ ।

यसबारे ३० गते शुक्रबार बिहान ७ं.३० बजे त्रिलोत्तमा नगरपालिका ५ मणिग्राम घोषणा कार्यक्रम राखिएको छ । सो कुराको जानकारी सिम नेपालका अध्यक्ष वातावरणविद् निपेश ढाकाले पत्रकारसम्मेलन मार्फत जानकारी गराएका हुन् । सिम नेपालसँगको सहकार्यमा तिलोत्तमा नगरपालिकाले सात महिनादेखि शुन्य पोलिथिन अभियान चलाउँदै आएको छ ।

नगरपालिकाले बनाएको कार्यविधिमा खुला रुपमा पोलिथिनजन्य फोहोर नफालिएको अवस्थालाई शुन्य पोलिथिन भनिने उल्लेख छ ।
नगरबासीको घर–आँगन, टोल–समुदाय, खेत–खलियान, कुलो–नहर, वन–जंगल, सडक–बाटो, सार्वजनिक स्थलबाट झण्डै ८० हजार बोरा पोलिथनजन्य फोहोर संकलन गरी व्यवस्थापन गरेपछि नगरलाई शुन्य पोलिथिन घोषणा गर्न थालिएको हो ।

शुन्य पोलिथिनलाई स्थायित्व दिन विभिन्न सार्वजनिक स्थान, घर, पसलमा डष्टबिन राखिएको छ । नगरका सार्वजनिक स्थानमा कम्तिमा एक हजार डष्टबिन राख्ने नगरपालिकाको योजना रहेको बताइएको छ । फोहोर संकलन कार्यसँगै संकलित फोहोरको व्यवस्थापनका लागि जनसहभागिता वास सहकारीसँगको सहकार्यमा एकीकृत फोहोर प्रशोधन केन्द्रसमेत निर्माण थालिएको छ ।

सार्वजनिक स्थलमा धुम्रपान तथा सुर्तीजन्य पदार्थ सेवनलाई निषेध गरिएको छ भने जथाभावी फोहोर फ्याक्नेलाई कारवाही गर्न आवश्यक स्थानीय कानुन निर्माण गरिएको छ ।

मुलुकका ७५३ स्थानीय तहमध्ये पहिलो पटक तिलोत्तमाको १२६ वर्गकिलोमिटर क्षेत्रमा वर्षौंदेखि डम्पिङ भएर बसेको पोलिथिन फोहोर संकलन गरी व्यवस्थापन गरिएको पनि ढाकाले बताए । यो अभियानको सफलता माटोमाथिको विजयी भएको उल्लेख गर्दै उनले यसलाई निरन्तरता दिन तिलोत्तमाबासीलाई आग्रह गरेका छन् ।

नगरका १७ मध्ये १६ वडालाई शुन्य पोलिथिन क्षेत्र घोषणा गरिसकिएको छ भने बाँकी वडा नं १४ लाई घोषणा गरेसँगै तिलोत्तमा शुन्य पोलिथिन नगर बन्नेछ ।