हामी सबैकाे संसारन्यूज

जनसम्पर्क समिति अष्ट्रेलियाको बिवाद सामाजिक संजालमा छरपस्ट भएको छ । गुट–उपगुट त हामी नेपालीको अहिलेको संस्कृति नै हो । जनसम्पर्क समितिको यो बिबाद पनि पहिलो र नौलो त पक्कै होइन । महाधिबेसन गर्न माउ पार्टीको ताकेतले गर्दा अहिले पेचिलो हुँदै गएको देखिन्छ ।

जसरी कांग्रेसमा बिबादको बिषय नै कसरी आफू नेतृत्वमा पुग्ने भन्नेमा केन्द्रित हुन्छ यहाँ पनि त्यस्तै हो । नेतृत्व हत्याउन गुट बलियो चाहिन्छ ! गुट बलियो बनाउन आफ्ना समर्थक चाहिन्छ । जस्को जति धेरै समर्थक हुन्छन उही बलियो देखिन्छ ।

हरेक समस्याले आफूसँगै समाधानको उपाय पनि लिएर आएको हुन्छ । हालको जनसम्पर्क समितिको बिबाद पनि समाधान गर्नै नसकिने खालको पक्कै पनि होइन होला तर दुरभाग्य जब बिवाद ब्यक्ती बिशेषमा गएर अडकिन्छ अनि समाधानको बाटो साघुरो हुन्छ ।
गुटमा बिभक्त र बिभाजित कार्यकर्ता र समर्थकहरुले सत्यको पक्षमा वकालत गर्न बिर्सिसकेका हुन्छन् । उग्र भएर सन्जालमा एक अर्काबिरुद्ध यदुबंशिय शैलिमा आक्रमणमा उत्रन्छन् ।

जीवनको कुनै कालखन्डमा नेपालमा राजनीति गरेको मान्छेमा राजनीतिको नशा त चढेको हुन्छ नै ! लामो समय अष्ट्रेलियामा बसेर जीवनलाई ब्यबस्थित वनाइसकेको मान्छेको नेपालमा रहेको कुनै न कुनै शक्तिशाली र गुटको नेतासँग साईनो नगासिएको मान्छे बिरलै होलान् ! उताबाट पनि आ–आफ्ना लाई केही निर्देशन आईरहन्छ होला ।

भुइँ कार्यकर्ताले नबुजेको के हो भने यो बिबाद जम्मा जम्मी नेतृत्वमा पुग्ने र कालान्तरमा माउ पार्टीको आगामी महाअधिबेसनमा प्रतिनिधिमा छानिने सम्म को हो ।

अन्त्यमा सधैं बल्झिरहने पिलो निचोरेर खिल झिकेर फालियोस ताकी भबिश्यमा यस्तो दुखाइ सहनु नपरोस् ।