हामी सबैकाे संसारन्यूज

९ चैत, काठमाण्डौं । सरकारले लगाएको अस्थायी प्रतिबन्धको वेवास्ता गर्दै सिंगापुरको सिल्क एयरले शनिबार राति ९८ यात्रुलाई काठमाण्डौं ल्याएको छ ।

राति ८ः३० मा त्रिभुवन विमानस्थलमा अवतरण गरेको बोइङ ७३७ मा एकजना अष्ट्रेलियाली नागरिक र ९७ जना नेपाली आएका हुन् । एकजना नेपाली नेदरल्याण्डबाट र एकजना अष्ट्रेलियाबाट सिंगापुर ट्रान्जिट हुँदै आएको आइतबारको कान्तिपुर दैनिकमा समाचार छ ।

बंगलादेशको आकासमा आइपुगेपछि उक्त जहाजलाई त्रिभुवन विमानस्थलको एयर ट्राफिक कन्ट्रोलर (एटीसी) ले फिर्ता जान निर्देशन दिएको थियो तर पाइलटरले रिफ्युल गर्नुपर्ने बताएपछि एटिसीले काठमाण्डौं ओर्लन अनुमति दिएको थियो । एटीसी प्रशासनले ओर्लन नदिएपछि यात्रुले होहल्ला गरेक थिए । यात्रुले नर्फकने भन्दै नाराबाजी गरेपछि पाइलटले ‘होहल्ला र त्रासका बीच जहाज उडाउन नसक्ने’ सन्देश एटिसीलाई पठाएका थिए । त्यसपछि राति ११ बजे सबै यात्रुलाई ओराल्न अनुमति दिएको थियो ।

ओर्लिएका सबै जनालाई १४ दिनको क्वारेन्टाइनमा पठाइएको छ । उनीहरुलाई सेनाका चिकित्सकको निगरानीमा राखिएको छ ।