हामी सबैकाे संसारन्यूज

१ बैशाख, साउदी । साउदीमा कोरोना संक्रमितहरुको संख्या ४ हजार ९३४ पुगेको छ भने मृतकको संख्या ६५ पुगेको छ ।

साउदीमा आज ६ जनाको मृत्यु भएको छ भने आजै ४७२ जनामा नयाँ संक्रमण देखिएको छ । साथै उपचारपछि निको भएर घर फर्कनेको संख्या ८०५ पुगेको साउदी अधिकारीहरुले जानकारी दिएको साउदीस्थित नेपाली दूतावासले जानकारी दिएको छ ।

दूतावासका अनुसार आज थप नेपालीमा संक्रमण भएको पाइएको छैन ।

त्यस्तै साउदीले हवाइजहाज, रेल तथा बस लगायतका सार्वजनिक यातायातका साधनहरुबाट एक स्थानबाट अर्को स्थानमा सजिलै र शीघ्र यो रोगको संक्रमण हुने भएकाले अहिले नियमित हवाइसेवा तथा अधिकांश सार्वजनिक यातायातहरु यथावतरुपमा बन्द रहेको छ ।

हवाई जहाजको यात्रा गरेकाहरुमा २ हप्ता भन्दा लामो समयसम्म पनि यो भाइरस शुसुप्त अवस्थामा रहने देखिएको बुझिएको छ ।

त्यसैगरी व्यक्तिगत स्पर्श र व्यक्ति व्यक्तिबीच आवश्यक दुरी कायम नहुँदा संक्रमण एक व्यक्तिबाट अर्कोमा शीघ्र हुने हुँदा सामाजिक दुरी कायम गर्न आवश्यक छ भनिएको छ । यसलाई पूर्णरुपमा मनन गरी संक्रमणको यो संकटको समयमा जहाँ छौ त्यहाँ सुरक्षित बसौँ भनेर सबै नेपालीलाई सर्तक बनाएको छ ।