हामी सबैकाे संसारन्यूज

६ वैशाख, काठमाडौँ । कोरोना संक्रमण भएर शहिद शुक्रराज ट्रपिकल तथा सरूवा रोग अस्पतालमा उपचार गरी पूर्ण स्वस्थ भएर प्रसिद्धि श्रेष्ठ आज घर फर्किएकी छिन ।

चैत १० गते कोरोना संक्रमण पोजेटिभ देखिएको उनी शनिबार टेकुको शुक्रराज ट्रपिकल तथा सरुवा रोग अस्पतालबाट डिस्चार्ज भएकी हुन् । उनी नेपालको दोस्रो संक्रमित थिइन ।

उनको शुक्रबार गरिएको कोरोना संक्रमण परीक्षणको रिपोर्ट नेगेटिभ आएको थियो र शनिबारको रिपोर्ट पनि नेगेटिभ आएकाले डिस्चार्ज गरिएको अस्पतालले जानकारी दिएको छ । यसबारे आधिकारीक रुपमा केही बेरमा स्वास्थ्य मन्त्रालयले जानकारी दिने बताइएको छ ।

उनी गत चैत्र ४ गते फ्रान्सबाट कतार एयरवेज हुँदै नेपाल आएकी थिइन् । चैत्र १० गते उनलाई कोरोना पुष्टि भएसँगै कोरोना रोकथामका लागि भोलिपल्ट देखि नेपाल सरकारले देशभर लकडाउन घोषणा गरेको थियो ।

नेपालमा पहिलो र दोस्रो सक्रमित घर फर्किएसँगै नेपालीलाई कोरोनाविरुद्ध लड्ने थप उत्साह मिलेको छ ।

गत माघ ९ गते नेपालमा पहिलो कोरोना संक्रमित भेटिएका थिए ।चीनको वुहानबाट आएका ती पुरुष  ठीक भएर घर फर्किसकेका छन् । नेपालमा अहिलेसम्म देखिएका ३० जना कोरोना संक्रमितमध्ये प्रसिद्धिसहित दुई जना निको भएर घर फर्किएका छन् । शुक्रबारमात्रै नेपालमा एकैपटक १४ जना कोरोना संक्रमित थपिएका थिए ।

तस्विर स्रोत : स्वास्थ्य मन्त्रालय