हामी सबैकाे संसारन्यूज

९ पुस, काठमाडौँ । काठमाडौँ उपत्यकामा शुक्रबार गरिएको अनुगमनका क्रममा फेला परेका म्याद सकिएका पेय पदार्थ नष्ट गरिएको छ ।

आपूर्ति व्यवस्थापन तथा उपभोक्ता हित संरक्षण विभागले नियमित रुपमा गरेको अनुगमनका क्रममा पञ्चकन्या माई किराना स्टोर, पुरानो बानेश्वरबाट म्याद सकिएका १२ बोतल पेप्सी, स्प्राइट र फान्टा नष्ट गरिएको हो ।

त्यसैगरी खरेल एन्ड सन्स स्टोर पुरानो बानेश्वरबाट तीन बोतल र किराना पसल भीमसेनगोलाबाट १० बोतल पेय पदार्थ नष्ट गरिएको अनुगमन अधिकृत दीपकराज पोखरेलले जानकारी दिनुभयो ।

अनुगमनका क्रममा मूल्यसूची नभएको, नापतौल यन्त्र नवीकरण नगरिएको, सूचनापाटी नराखिएको, व्यवसाय दर्ता नगरिएको र म्याद नाघेको सामग्री बिक्री वितरण गरेको पाएपछि रीता किराना पसल पुरानो बानेश्वरलाई मूल्यसूची र सूचनापाटी तत्काल राखी सात दिनभित्र विभागमा आउन निर्देशन दिइएको छ । विभागले उपभोक्ता स्वयम्लाई सचेत भएर उपभोग्य सामग्री खरिद गर्न पनि आग्रह गरेको छ ।