हामी सबैकाे संसारन्यूज

२४ जेठ, लण्डन । विश्वभर महामारीका रुपमा फैलिएको कोरोना भाइरस (कोभिड–१९) बाट संक्रमित भएका १४ हजार बढी नेपालीमा शनिवार (६ जुन २०२०) साँझसम्म ५ हजार ५ सय ९० जना नेपाली कोरोना संक्रमणबाट मृक्त भएको समाचार छ ।

गैरआवासीय नेपाली संघका अनुसार कोरोना संक्रमणबाट विदेशमा हालसम्म १२५ नेपालीको मृत्यु भएको छ । जसमा यो साता कतारमा ४ जना, कुवेतमा १ जना, युकेमा १ जना गरि ६ जनाले कोरोना भाइरसको कारणले ज्यान गुमाएको तथ्यांक एनआरएनएले सार्वजनिक गरेको छ ।

यद्यपी विदेशमा कोरोना संक्रमणका कारण मृत्यु हुने र संक्रमित हुने नेपालीको संख्या उल्लेख्य रुपमा कमि आएको एनआरएनएले बताएको छ । विगतमा भन्दा यो साता संक्रमित हुने र मृत्यु हुनेमा झण्डै ७५ प्रतिशतले कमी आएको संघको दावी छ ।

संघका अनुसार हालसम्म विश्वका ३४ देशमा कोरोना भाइरसबाट संक्रमित भएका १४ हजार ४ सय ५४ जना नेपालीमा ५ हजार ५ सय ९० जना कोरोना संक्रमण मुक्त भएका हुन् ।

गैरआवासीय नेपाली संघ स्वास्थ्य समितिका संयोजक डा. संन्जिव सापकोटाका अनुसार संघ अन्तर्गतको स्वास्थ्य समितिले संकलन गरेको तथ्यांक अनुसार विश्वका ३४ देशमा रहेका नेपालीहरु कोरोना भाइरसबाट प्रभावित भएका छन् भने १३ देशमा रहेका नेपालीहरुको ज्यान गएको छ ।

कोरोना भाइरसका कारण बेलायत, संयुक्त राज्य अमेरिका, युएई, साउदी अरब, बहराइन, कुवेत, कतार, आयरल्याण्ड, जापान, टर्की, नेदरल्याण्डस्, र स्वीडेनमा रहेका नेपालीको मृत्यु भएको संघले बताएको छ । बहराइनस्थित नेपालीली दूतावासले भने कोरोना भाइरस संक्रमणका कारण बहराइनमा कुनैपनि नेपालीको मृत्यु नभएको बताउँदै आएको छ ।