हामी सबैकाे संसारन्यूज

८ असार, काठमाण्डौ । एमसीसी विरुद्ध संयुक्त संघर्ष समिति नेपालले एमसिसि विरुद्धको आन्दोलन शसक्त पार्ने जनाएको छ । एमसिसि विरुद्धको संघर्ष केन्द्रिकृत पार्ने क्रममा आज ४ बजे न्युरोडको जुद्धशालिकमा प्रदर्शन हुने जनाइएको छ ।

नेकपा नेता तथा एमसिसि विरोधि आन्दोलनका अगुवा नारायणप्रसाद शर्माका अनुसार सो अभियानका उपलब्ध अभियन्ताहरु र एमसिसि विरुद्ध संघर्षरत अन्य विभिन्न राजनीतिक र सामाजिक, सांस्कृतिक संघसंस्था र व्यक्ति तथा व्यक्तित्वहरुको उपस्थितिमा आइतबार भएको संयुक्त बैठकले वरिष्ठ वामपन्थी विद्वान व्यक्तित्व स्वनाम साथीको संयोजकत्वमा एमसिसि विरुद्ध संयुक्त संघर्ष समिती गठन गरेको छ । उहाँका अनुसार सो बैठकले राष्ट्रघाती एमसिसि खारेजको लागि देस बिदेसका एमसिसि विरोधी शक्ति, व्यक्ती, संघसंस्थाहरु र तिनले गरेका संघर्षहरुलाई संयोजन गरि एकीकृत र केन्द्रीकृत संघर्ष गर्ने बताउँदै संघर्षका विभिन्न नीति, कार्यक्रम र नाराहरु समेत घोषणा गरेको छ ।

यस्तो छ नीति :
१) घातक एमसिसि विरोधी सबै राजनीतिक वा सामाजिक शक्ति, व्यक्ती वा व्यक्तित्व, संघसंस्था, मंच, मोर्चा र अभियान तथा प्रतिष्ठान आदि र तिनले गरिरहेका सबै संघर्षहरुसंग संयोजित, संयुक्त र एकताबद्ध भएर एकीकृत र केन्द्रीकृत संघर्ष गर्ने नीति लिने ।
२) उपरोक्त नीति अनुरुप सकेसम्म एक मोर्चा एउटै निसाना बनाएर, नभए पनि अनेक मोर्चा एउटै निसाना बनाएर संघर्ष एकीकृत गरी प्रहार केन्द्रित गर्ने ।
३) उक्त संयुक्त संघर्ष समितिमा आबद्ध भएका वा नभएका शक्ति वा संस्थाहरुले आजभन्दा पहिले घोषणा गरेका एमसिसि विरुद्धका संघर्षहरुमा संघर्ष समितिको समर्थन, सहयोग र सहभागिता समेत रहने र उनीहरुबाट पनि यसैगरी आफ्नो कार्यक्रमलाई सहयोग तथा सद्भाव जुटाउने ।
४) एमसिसि खारेज नहुँदासम्म संघर्षलाई निरन्तरता दिई निर्णायक बनाएर निष्कर्षमा पुराउने आदि ।

यस्ता छन् कार्यक्रमहरु :
१) आज देखि हाललाई असार १६ सम्म साँझ ८ बजे १० मिनेट बत्ती निभाएर ब्लाक आउटमार्फत एमसिसिको विरोध जनाउने ।
२ आज अपरान्ह ४ देखि ५ बजेसम्म १ घण्टा न्युरोड सालिकचोकमा एमसिसि विरोधी शक्ति र संघसंस्थाहरुले आआफ्ना झण्डा तथा व्यानर प्रदर्सन गरि एमसिसि को विरोध गर्ने ।
३) नेकपा (नेकपा) स्थायी समिती सदस्यहरुलाई यही असार १० गते हुने उहाँहरुको बैठक अघि नै उहाँहरुलाई यही दस गते भित्र एमसिसि अघि नबढाउन अनुरोध गर्ने र त्यसपछी आवश्यक परे सबै दलका संघीय संसदका सांसदहरुलाई एसएमएस फोन, इमेल आदि गरि एमसिसि कुनै हालतमा पास नगर्न खबरदारी गर्ने ।
४) व्यक्तिगत र संस्थागत रुपले सबैले मिडिया र सामाजिक सन्जाल उपयोग गरि विरोध कार्यक्रमहरु भव्य र व्यापक गर्ने ।
५) अन्य ११ दलहरुसङ्ग मिलेर सभामुखलाई ज्ञापनपत्र दिने ।
६) २०७७/३/९ मा ११ दलले काठमाडौमा गर्ने विरोध प्रदर्शनमा सहयोग गर्ने र सहभागी हुने तथा यसै दिन मोफसलहरुमा पनि विभिन्न विरोधका कार्यक्रमहरु गरी तिनमा कम्तीमा एक लाख मानिसहरुको सहभागिता गराउने ।
७) विभिन्न प्रकारका विरोधका कार्यक्रमहरु गर्न देस, विदेस सबैतिर अनुरोध गर्ने ।
८) नागरिक आवाज, संपदा संरक्षण लगायतका संघसंस्थाहरुले एमसिसि विरुद्ध संचालन गरेको उपत्यका पदयात्रा कार्यक्रमहरुलाई समर्थन गर्दै सो को समापन स्वरुप २०७७/३/१२ मा काठमाडौको बसन्तपुरमा आयोजित एमसिसि विरोधी सभाको कार्यक्रमलाई भव्य रुपमा सफल पार्ने ।
९) उपरोक्त कार्यक्रम लगायतका बैठक, भेला र संघर्षका अन्य सबै कार्यक्रमहरुमा सत्तासीन नेकपाका एमसिसि विरोधी नेताहरुलाई आमन्त्रण गरी सहभागी बनाउन जोड गर्ने ।

यस्ता हुने छन् नाराहरु :
१) एमसिसि सम्झौता खारेज गर । राष्ट्रिय स्वाधीनताको रक्षा गर ।।
२) एमसिसि सहयोग चाहिंदैन । देश बेच्न पाइँदैन ।।
३) जनता होऔं होशियार । नेतालाई गरौं खबरदार ।।
४) भन्नोस, एमसिसि के के हो ? आईपीएसको अङ्ग हो ।।
५) भन्नोस् आईपीएस के के हो ? साम्राज्यवादी गठबन्धन हो ।।
६) एमसिसि एउटा जाल हो । नेपाल खाने चाल हो ।।
७) एमसिसि संशोधन धोका हो । द्वन्द्व छिर्ने ढोका हो ।।
८) असंलग्न नेपाललाई । सैन्य गठबन्धन चाहिंदैन ।।
९) पन्चशीलको सिद्धान्त । मासी खान पाइँदैन ।।
१०) इन्डो अमेरिकी गठबन्धन । मुर्दावाद मुर्दावाद ।।
११) नेपाली राष्ट्रिय स्वाभिमान । जिन्दावाद । जिन्दावाद ।।
१२) संयुक्तआन्दोलन जिन्दावाद । जिन्दावाद । जिन्दावाद ।।
१३) संयुक्त संघर्ष समिती जिन्दावाद । जिन्दावाद । जिन्दावाद ।।

सो संयुक्त संघर्ष समितिमा विभिन्न सामाजिक, सांस्कृतिक संघसंस्थाहरु, नेकपाका विभिन्न घटकहरु, विभिन्न देसभक्त मिडियाहरु, विदेसस्थित विभिन्न नेपाली संघसंगठनहरु र तिनका प्रतिनिधिहरुको आबद्धता रहेको जनाइएको छ ।