हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)को बैठकप्रति राष्ट्रिय प्रजातन्त्र पार्टीका अध्यक्ष कमल थापाले आपत्ति जनाएका छन् । उनले नेकपाको बैठक प्रधानमन्त्रीको सरकारी निवास प्रयोग गरि गरिएको भन्दै आपत्ति जनाएका हुन् ।

थापाले सत्तारुढ नेकपाले पार्टी काममा सरकारी साधन स्र्रोतको दुरुपयोग गर्दै खुलेआम भ्रष्टचार गरेको आरोप लगाएका छन् । उनले प्रधानमन्त्रीबाट अख्तियारको दुरुपयोग पनि गरिएको बताएका छन् ।

सामाजिक सञ्जालमार्फत थापाले भनेका छन्, ‘प्रधानमन्त्रिको सरकारी निवास, कार्यालय र त्यहाँ रहेका सरकारी साधनश्रोतको दुरुपयोग गरि पार्टीको बैठकरकार्यक्रम गर्नु खुलेआम भ्रष्टाचार हो, अख्तियारको दुरुपयोग हो।’

प्रधानमन्त्रिको सरकारी निवास,कार्यालय र त्यहाॅ रहेका सरकारी साधनश्रोतको दुरुपयोग गरि पार्टीको बैठक/कार्यक्रम गर्नु खुलेआम भ्रष्टाचार हो,अख्तियारको दुरुपयोग हो।राज्यलाई पार्टीको सम्पति ठान्ने अनैतिक/अलोकतान्त्रिक कार्य अन्त गरियोस्।राज्यको सम्पति रक्षागर्नु @PM_Nepalको कर्तव्य हो

— Kamal Thapa (@KTnepal) June 26, 2020

थापाले राज्यको सम्पत्तिलाई नेकपाले अनैतिक र अलोकतान्त्रिक ढंगले दुरुपयोग गर्न बन्द गर्नुपर्ने माग गरेका छन् । उनले ट्विटमा पिएम नेपाललाई ‘मेन्सन’ गर्दै राज्यको सम्पत्ति रक्षाको माग गरेका छन् ।

बुधबारदेखि सुरु भएको सत्तारुढ नेपाल कम्युनिष्ट पार्टी (नेकपा)को स्थायी समिति बैठक प्रधानमन्त्री निवास बालुवाटार बसिरहेको छ । सत्तारुढ नेकपाले प्रधानमन्त्री ओलीको स्वास्थ्य कारण देखाउँदै पार्टीका अधिकांश बैठक तथा सभाहरु प्रधानमन्त्री निवासमा गर्दै आएको छ ।

केपि शर्मा ओली प्रधानमन्त्रीमा नियुक्त भएसँगै सरकारी निवासलाई पार्टी कार्यक्रमका लागि गरिएको दुरुपयोगको बेला–बेला विरोध पनि हुँदै आएको छ । तर, नेकपाले आफ्नो कार्यक्रम पार्टी कार्यलयभन्दा बढि सरकारी निवासमा गर्ने गरेको छ ।