Sansar News
काठमाडौं । सरकारले संघीय संसदको अधिवेशन अन्त्य गर्ने गरेको निर्णयप्रति कांग्रेस नेता गगन थापाले आक्रामक टिप्पणी गरेका छन् । उनले संसद अधिवेशनको अन्त्य सरकारको विनाश हुने बेलाको बुद्धि भएको बताएका छन् ।
सरकारले संघीय संसदको चालु अधिवेशन अन्त्य गर्ने निर्णय गरेको सन्दर्भमा सामाजिक सञ्जालमार्फत प्रतिक्रिया दिँदै थापाले पार्टीभित्रको किचलोमा संसदलाई अचानोमा पारिएको उल्लेख गरेका छन् ।
‘संघीय संसदको चालु अधिवेशन अप्रत्यासित रुपमा अन्त्य, विनासकाले विपरित वुद्धि !’, सामाजिक सञ्जाल ट्विटरमार्फत थापाले भनेका छन्, ‘संसदमा थुप्रै विधेयकहरू कार्यसूचीमा र प्रक्रियामा छन,कोभिड–१९ लगायत विभिन्न विषयमा प्रस्ताव दर्ता छन् । पार्टीभित्रको किचलोको अचानोमा संसद !’
संघीय संसदको चालु अधिवेशन अप्रत्यासित रुपमा अन्त्य!
विनासकाले विपरित वुद्धि!संसदमा थुप्रै विधेयकहरू कार्यसूचीमा र प्रक्रियामा छन,कोभिड-१९ लगायत विभिन्न विषयमा प्रस्ताव दर्ता छन।
पार्टीभित्रको किचलोको अचानोमा संसद!संसदलाई छलेर अव कुनै पनि अध्यादेश ल्याउने दुस्प्रयास नहोस्।
— Gagan Thapa (@thapagk) July 2, 2020
ओली नेतृत्वको सरकारको यो निर्णय संसदलाई छलेर अध्यादेशहरु ल्याउने दुस्प्रयास पनि हुनसक्ने थापाको भनाई छ । ‘संसदलाई छलेर अव कुनै पनि अध्यादेश ल्याउने दुस्प्रयास नहोस्’, उनले भनेका छन् ।
सरकारले संघीय संसदको दुवै सदनको चालु अधिवेशन अन्त्य गर्ने निर्णय गरेको छ । मन्त्रिपरिषदको सिफारिसमा राष्ट्रपति विद्यादेवी भण्डारीले उक्त निर्णय कार्यान्वयनमा ल्याएकी छिन् । विभिन्न महत्वपूर्णं विधेयकहरुमाथि छलफल चलिरहेको बेला अप्रत्यासित संसद अधिवेशन अन्त्य गरिएसँगै राजनीतिक वृत्तमा सरगर्मी तातेको छ ।
वि.सं.२०७७ असार १८ बिहीवार १५:५४ मा प्रकाशित
