Sansar News
२० असार, काठमाडौँ । संयुक्त राष्ट्र संघअन्तर्गतको अन्तर्राष्ट्रिय श्रम संगठन (ILO) ले कोभिड–१९ सँग लड्नको लागि गैरआवासीय नेपाली संघ (एनआरएनए) लाई ४ लाख २४ हजार ३१० डलर अर्थात् रू ५ करोड १० लाख अनुदान दिने भएको छ ।
एनआरएनएका अध्यक्ष कुमार पन्तले लामो समयको प्रयासपछि आइएलओले सो सहयोग उपलब्ध गराउने भएको जानकारी दिएका छन् ।
सो विषयमा सहमतिपत्रमा समेत हस्ताक्षर भएको जानकारी गराउँदै उनले त्यसबाट आफूहरु उत्साहित र हर्षित भएको बताएका बताए ।
उनले संघको पहलमा विदेशमा अप्ठ्यारोमा परेका नेपालीको उद्धार भइरहँदा श्रमिकको लागि अनुदान रकम उपलब्ध हुनुलाई थप जिम्मेवारीबोधको रुपमा लिएको बताएका छन् ।
उक्त रकम विशेष गरी कोभिड–१९ बाट प्रभावित मलेसिया, युएई, कतार र साउदी अरब गरी चार देशका नेपालीको सहयोगार्थ भएको जानकारी दिँदै उनले सो रकम कोभिड-१९ ले श्रम बजारमा पारेको प्रभाव अध्ययन गर्न र श्रमिकको हितमा खर्चिइने बताए । साथै आईएलओबाट प्राप्त सहयोग नेपाल फर्किनेहरुका लागि समेत खर्च गरिने पनि उनले जानकारी दिएका छन् ।
संघले ती मुलुकमा रहेका नेपालीको सहयोगका लागि नेपाली कूटनीतिक नियोगसँग समन्वय गरी कार्यालय स्थापना गरेर आफ्नो कार्य अघि बढाउने तयारी गरेको छ । । ती कार्यालयबाट विदेशमा कोरोनाकै कारण काम छाड्न बाध्य पारिएकालाई सुरुमै कानुनी परार्मश दिने पनि संघको तयारी छ ।
वि.सं.२०७७ असार २० शनिवार १७:२८ मा प्रकाशित
