हामी सबैकाे संसारन्यूज

२५ असार, मुगु । जिल्लाका चारवटै स्थानीयतहमा कोरोना संक्रमित ब्यक्तिलाई राख्न सुबिधायुक्त प्रारम्भिक आइसोलेसन तयार गरिएको छ ।
देशभर कोरोना महामारीको संख्या बृद्धि भई रहेको अबस्थामा अप्ठेरो नहोस् भन्ने हिसावले सोरु, खत्याड, मुगुम कार्मारोङ गाउँपालिका र छायाँनाथ रारा नगरपालिकामा १ सय १२ बेडको प्रारम्भिक आइसोलेसन तयार गरिएको प्रमुख जिल्ला अधिकारी कृष्ण कुमार निरौलाले जानकारी गराए ।
आइसोलेसन निर्माण जुटने ब्यक्ति सहयोगी निकायलाई प्रजिअले धन्यबाद समेत दिएका छन् ।

छायाँनाथ रारा नगरपालिकाको नबनिर्मित कारागार भवनमा ५७ बेड, सोरु गाउँपालिकाको जनज्योति माध्यमिक बिद्यालय नार्थपुमा २० बेड, खत्याड गाउँपालिकामा २० बेड र मुगुम कार्मारोङ गाउँपालिकाको पूलुमा १५ बेड गरि १ सय १२ बेडको प्रारम्भिक आइसोलेसन तयारी अबस्थामा राखिएको छ ।
आइसोलेसन निर्माणमा सम्बन्धित स्थानीयतह, युएमएन कलष्टर मुगु र रेडक्रस शाखा मुगु, हेरिस्डेक संस्थाले आबश्यक समान सहयोग गरेको पाइएको छ ।

मुगुमा कोरोना संक्रमित ब्यक्तिको संख्या शून्य भएपनि पछि संक्रमण फैलिएको खण्डमा जटिल समस्या उत्पन्न नहोस् भन्ने हिसावले चारवटै स्थानीयतहमा सुबिधायुक्त आइसोलेसन तयारी गरिएको छ ।

संकट उत्पन्न नहोस् भनेर पूर्वतयारी गरेका हौं
जयबहादुर मल्ल, सभापति रेडक्रस
हिमाली जिल्ला मुगुमा कोरोना संक्रमण देखा नपरेको भएपनि यदी फैलिएको खण्डमा संकट उत्पन्न नहोस भन्ने हिसावले चारवटै स्थानीयतहमा सुबिधायुक्त प्रारम्भिक आइसोलेसन निर्माण गरिएको छ । उक्त आइसोलेसनमा कोरोना रोग देखा परेका प्रथम चरणका बिरामी राखिने छ । रेडक्रसको संयोजकत्वमा आइसोलेसन व्यवस्थापन समिति गठन गरिएको छ ।

बिपत्त ब्यवस्थापन कोषको रकमबाट आइसोलेसन निर्माणमा जम्मा २७ हजार मात्र खर्च भएको छ अरु सबै कर्मचारी संघ संस्थाले जनश्रमदान तथा समाग्री सहयोग प्रदान गरेका हुन् । निर्माण गरिएका आइसोलेसन सुबिधायुक्त छन् । कोरोना महामारीलाई लक्षित गरी एम्बुलेन्स खरिद गर्ने भन्ने जिल्ला बिपत्त ब्यवस्थापन समितिले निर्णय समेत गरेको छ ।

सामग्री दुरुपयोग नहोस्
नेत्रबहादुर शाही,
युएमएन कलस्टर मुगुका कार्यक्रम व्यवस्थापक
खत्याड गाउँपालिका बाहेक छायाँनाथ रारा नगरपालिका सोरु र मुगुम कार्मारोङ गाउँपालिकामा प्रारम्भिक आइसोलेसनलाई चाहिने समान उपलब्ध गराए बापत हाम्रो यस संस्थाबाट २ लाख ५८ हजार बजेट खर्च भएको छ । यसमा ढुवानी रकम जोडिएको छैन । कम्मल, डसना, सिरानी, डिफर्म, ड्रम, सेनिटाइजर, माक्स, बाटा बाल्टीन, कचौरा, गिलास, चप्पल, साबुन, लगायत समाग्रीहरु आइसोलेसनलाई हस्तान्तरण गरेका छन् । सोरु गाउँपालिकाको नार्थपुमा रहेको प्रारम्भिक आइसोलेसनलाई उज्यालोको निम्ति शौर्यपाता समेत दिएका छौ । हामीले उपलब्ध गराएका समाग्री दुरुपयोग नहोस् र सही सदुपयोग होस भन्न चाहन्छौ ।

आइसोलेसनका १ सय १२ बेड खाली
मुगुमा कोरोना संक्रमित नहुँदा प्रारम्भिक आइसोलेसनका सबै बेड अहिले खाली अबस्थामा नै छन् । अन्य जिल्लामा कोरोना संक्रमण देखा पर्दै गएपनि मुगुमा भने शून्य देखिएको जिल्ला स्वास्थ्य सेवाले जनाएको छ ।

माक्स नलगाई ओहोर दोहोर
कोरोना महामारीलाई लक्षित गरि गृहमन्त्रालयले सर्बसाधारण कर्मचारी सुरक्षाकर्मीलाई अनिबार्य माक्स प्रयोग गर्न र गराउन सम्बन्धित जिल्ला प्रशासन कार्यालयलाई निर्देशन जारी गरेको छ । तर मुगुमा अधिकांस स्थानीय कर्मचारीले माक्स नलगाई कामकाज र बजार क्षेत्रमा ओहोर दोहोर गरेको पाइन्छ ।

‘मुगुमा कोरोना छैन’ भनेर हेलचेक्रयाई गर्ने गरेको पाइएको छ । बिना माक्स ओहोर–दोहोर गर्दा कोरोना संक्रमणको जोखिम बढ्ने आकंलन गरिएको छ ।