हामी सबैकाे संसारन्यूज

काठमाडौं । पशुपति क्षेत्र विकास कोषले भट्ट हटाउने चर्चा मिथ्या भएको बताएको छ । बिहिबार एक प्रेस विज्ञप्ती जारी गर्दै कोषले पशुपतिको भट्ट परिवर्तनबारे कुनै सोंच नरहेको स्पष्ट पारेको हो ।

कोषका सदस्य सचिव डा. प्रदीप ढकालद्धारा हस्ताक्षरित विज्ञप्तीमा सरकार, मन्त्रालय र पशुपति क्षेत्र विकास कोष कसैको पनि भट्ट हटाउने सोंचन नरहेको बताइएको छ ।

‘नेपाल सरकारले पशुपतिमा हाल कार्यरत भट्टहरु हटाउन लागेको भनि विभिन्न अनलाईन न्यूज पोर्टलहरुमा आएको समाचारप्रति पशुपति क्षेत्र विकास कोषको गम्भीर ध्यानाकर्षण भएको छ’ विज्ञप्तीमा भनिएको छ, ‘नेपाल सरकार, संस्कृति, पर्यटन तथा नागरिक उड्डयन मन्त्रालय र पशुपति क्षेत्र विकास कोष कसैको पनि यस खालको सोंच नरहेको जानकारी गराउन चाहन्छौं ।’

विज्ञप्तीमा नेपाल र भारतबीच सदियौंदेखि चलेको सम्बन्धमा खलल पुग्ने कुनै पनि गतिविधि नगरिने पनि स्पष्ट पारिएको छ ।

प्रधानमन्त्री केपी शर्मा ओलीले राम र अयोध्याबारे अभिव्यक्ति दिएसँगै नेपालमा भट्ट परिवर्तन बारेको हल्ला चलेको थियो । केहि सञ्चार माध्यमले सरकारले भारतीय भट्टलाई हटाउन तयारी गरेको समाचारहरु प्रकाशित गरेका थिए । जसको चर्चा भारतीय मिडियामा समेत भएको थियो ।