हामी सबैकाे संसारन्यूज

६ साउन, काठमाण्डौं । ह्याम्स अस्पतालले कोरोना संक्रमितको उपचार गरेको चर्को शुल्क उठाएको छ । आफ्ना चालक दलका सदस्यहरुको उपचारबापत ह्याम्सले मनलाग्दी शुल्क उठाएको भन्दै नेपाल वायु सेवा निगमले छानविनका लागि स्वास्थ्य मन्त्रालयसँग माग गरेको छ ।

गत २२ असारमा निगमका चालक दलका सदस्यसहित १४ जनामा कोरोना संक्रमण देखिएको थियो । उनीहरुलाई ह्याम्स अस्पतालको आइसोलेसनमा राखेर पाँचदिन सामान्य उपचार गरिएको थियो ।

प्रतिदिन १ जनाको ३० हजार ९ सयका दरले उनीहरुबाट रकम असुलिएको छ । जब कि आइसोलेसनमा राखेर उपचार गर्नुपर्ने सामान्य संक्रमितको सरकारले दैनिक शुल्क १४ हजार ५०६ रुपैयाँमात्र तोकेको छ ।

ह्याम्सले १४ जनाको पाँचदिनको २६ लाख ७१ हजार चार सय २६ रुपैयाँको विल नेपाल वायुसेवा निगमलाई पठाएको मंगलबारको नयाँपत्रिका दैनिकमा समाचार छ ।
अस्पतालले एकजना विरामीबाट बेड चार्ज सात हजार पाँचसय, कोभिड चार्ज १० हजार, नर्सिङ चार्ज चार हजार आठसय, डाक्टरको शुल्क तीन हजार, इन्फेक्सन कन्ट्रोल दुई हजार, हाउसकिपिङ दुई हजार, खाना तथा पेय पदार्थ एकहजार ६ सय गरी ३० हजार नौ सय उठाएको छ ।

त्यसमा औषधिको शुल्क जोडेर प्रतिव्यक्ति न्यूनतम् एक लाख ७८ हजार दुई सय ७६ देखि दुई लाख १७ हजार ६ सय १९ रुपैयाँसम्म उठाइएको पाइएको छ ।