हामी सबैकाे संसारन्यूज

८ साउन, काठमाडौं । प्रहरी प्रधान कार्यालयले डुबेर ३ बालक सहित ४ जनाको मृत्यु भएको जनाएको छ ।

झापाको भद्रपुरनगरपालिका- २ स्थित नयाँ सिमसार क्षेत्रमा डुबेर ३ जना बालकको मृत्यु भएको छ । मृत्यु हुनेहरूमा सोही ठाउँ बस्ने अनिल तामाङको छोरा १० वर्षीय अंकुश तामाङ र कमला थामीका २ जना छोरा १५ वर्षीय करण थामी र १२ वर्षीय अर्जुन थामी रहेका छन् । घरबाट खेल्न निस्केकोमा घर फर्की नआएकोले आफन्तले खोजी गर्ने क्रममा अंकुश तामाङ नयाँ सिमसार क्षेत्रमा बुधबार डुबीरहेको अवस्थामा फेला परेका थिए भने वेपत्ताअन्य २ जना बालकको सोही सिमसार क्षेत्रको पानीमा बिहीबार बिहान शव फेला परेको प्रहरीले जनाएको छ ।

काभ्रेको पनौतीनगरपालिका- ७ स्थित त्रिवेणीघाटमा डुबेर सोही नगरपालिका- १२ भूमिडाँडा बस्ने ७० वर्षीय शोम प्रसाद हुमागाईको बिहीबार दिउँसो मृत्यु भएको छ । हुमागाईलाई त्रिवेणीघाटमा डुबेको अवस्थामा प्रहरी चौकी पनौतीबाट खटिएको प्रहरीले स्थानीयको सहयोगमा उद्दार गरी उपचारको लागि शिर मेमोरियल अस्पताल बनेपा पठाएकोमा उपचारको क्रममा उनको मृत्यु भएको जनाइएको छ ।